第十位：古惑仔主題餐廳開張
正式名稱叫「友情歲月古惑仔主題冰室」，聽講呢單野已經搞左大半年，因為版權及疫情問題一拖再拖，裝修已經完畢，就等林鄭一聲令下即時可以開餐。二五仔透露，除左有野食之外，仲有個精品區，會賣古惑仔或者港漫精品，咦，咁好似秋葉原高達餐廳？會唔會有囡囡侍應呀？
第九位：港漫慢慢傾網台崛起
以前都有唔少網台有港漫節目，最老資格是「港漫咬蕉幫」，最齊腳是「動漫遊世界」，由林尚言主持，曾經訪問黃玉郎一二三四五號徒弟，但數到最權威當然是由馬榮成主持的「漫筆經心」，不過今年最爆竟然係由漫畫迷大肥及俊仔主持「港漫慢慢傾」，平均每星期有三集，而且點擊量經常破萬，有人話大肥靠鬧人做話題，作為港漫讀者，行業熱熱鬧鬧總比冷清好，不過只咬住李中興唔放，又真係太慘了。
第八位：邱福龍x Hottoys合作出公仔
邱福龍公司叫Dark Comics and Toys Limited ，除咗comics之外，仲有Toys，證明龍少一早想做玩具公仔。今次同HotToys合作推出1/6 比例新作「猛毒化鋼鐵人」（Venomized Iron Man），算係頭威點勢，不過之前HotToys出的「風雲「公仔，只有雲、缺了風，係咪銷量唔理想呢？希望以後龍少可以陸續出公仔，不過大拳呢？
第七位：《西遊珍藏本》打入誠品十大
大家都習慣響報攤買港漫，至多去埋漫畫店或者書屋，今次鄭健和借住HMVOD 推出《西遊》粵語動畫版，同步推出10合1《西遊珍藏本》，無論設計及內容都叫好又叫座，而且港漫更首次響三中商同誠品有售，算是港漫一次突破，二五仔話，原本安排和仔響誠品搞簽名會，估唔到疫情又爆過，唯有等明年。
第六位：《古惑仔》完結，和平休戰
今年五月《古惑仔》正式大結局，牛佬掦言會出一本上海灘故事，亦即是《勝利人生：李浩東》，人算不如天算，牛佬突然病倒，仲要入醫留醫果隻，好彩牛佬慢慢病愈，但李浩東就脫期連場，加上牛佬狀態未回復，李浩東草草收場，之後再出《龍虎門外傳》已經無力回天，和平出版社靈魂人物失去信心，只好暫時退出江湖，筆者愚見，還是找機會重寫《古惑仔》，只要不是三日刊，還有一班人支持的。
今次倒數住五單新聞先，資深讀者應該估到仲有乜咩新聞未出，不過第一位，你肯定估唔到！？
