依瓦安房間中地圖的標示，只要再上一段長斜坡就會到達「病者和平協會」的根據地──翠林邨。
我還未完全接近，抬頭已經看見遠處的炊煙火光，證明前路的確有著活人。
大多時候，晚上外出都不會受到病者襲擊，因為它們普遍會進入到附近的建築物內。就像人類一樣，早上會外出獵食，晚上會入內休息。
什麼原因，大概只有對病者深感興趣的學者會去研究，我的興趣只在於解剖和研究。
多少，也是受到那個人的影響。
他曾經跟我說過，人類要消除心中對未知事物的畏懼，最簡單、有樂趣的方法，就是直接面對未知的畏懼，對它們進行抽絲剝繭，再加以掌控。
我倒想知道，那個人，如今還身在大本營嗎。
而且，已經走到了哪一步？
捱過不少冷風，我終於去到達「病者和平協會」的根據地。如一般倖存區，外圍被高高的障礙物所圍封住，要入去得找點法子。
把外圍封得再密的倖存區，都總會有百密一疏的地方，因為主要也是用來防範病者的入侵。對於人類這種會思考的生物來說，動動腦子就會想到辦法溜進去。
我略略打量了這些被搭得高高的障礙物，基本上是用傢俱作主體去堆疊，再用少量粗繩、釘子、金屬板、支架等物加以支撐住。
有別於艾寶琳倖存區會用泥水磚頭等封牆，連大本營也是用到大量金屬器材去做拉動式的機關大閘。
看來這個倖存區對於被外界入侵的風險，沒怎樣的警戒心。
於是，我用手術刀輕易地割斷了其中一條粗繩，再把它完全地扯出，並拋到其中一條支架上，讓繩子的另一端也落回自己手中，令繩子中間的位置拉緊住支架，並雙臂用力的抓住攀上，直至爬上區內為止。
「噠」不消一會，我已經攀上並跳入到倖存區之中。可能是個中、小型的倖存區關係，沒有太多的守衛，我要進來只像一隻老鼠溜進廚房般容易。
雖說地方的大小不及艾寶琳倖存區，但要孤身一人尋出頭目「三腦」所在，也太浪費時間。
我把目光放在插置於村內的火炬：「睇嚟......要火燒老鼠欄。」
三十分鐘後......
「走啊，好大火呀！！」、「出嚟，出嚟！唔好吸到啲濃煙！！！」、「咳...咳！啊...我朋友仲喺入面...」
翠林邨，已經變成一片火海。
熊熊大火在燃燒一切，在我看來四面也是火和濃烈的黑煙。
要做到這種程度，其實只是把火炬掉到去把倖存區圍住的障礙物上，因為它們是易燃的傢俱和連貫式地紮綁住一起當作外牆，因此不需一會就使得火光沖天。
就算是用水救，也不可能滅得熄了。
這裡早晚也會燒得一片清光，我安靠在一條燈柱旁，望著慌慌急急地自救、逃跑的區內居民之餘，還等待著「三腦」的出現。
既然這裡是「病者和平協會」的陣地，那燒清光也沒什麼大不了。
這種危急的情況下，身為領導人的「三腦」現身指揮是必然的吧。
要讓他出現，根本不費吹灰之力。
就讓我好好的，去看你真面目吧......
三腦。
「走啦...老鄧！」在人們都慌忙地逃生之際，有個男人在路中心焦慮地大喊。
「唔走得啊！三腦大人至少要我哋帶走所有「血酒」先可以走啊，好值錢嫁！！」被稱為老鄧的人，高喊。
「三腦...」我盯住那名叫老鄧的傢伙，繼而行了過去。
他跑到去不遠處的一橦大樓，只見數十個人正努力地把一個個酒桶堆放在推車上，想把它們一次過運走。
我印象中，這些酒桶在艾寶琳倖存區的大樓見過，是專門用來裝住「血酒」的木桶。
「三、二、一！推呀！！！！」幾個人正合力推著放有酒桶的木製推車，但也顯得有點吃力。
見況，我取出了雙節刀上前對那些人快速地亂劃了幾刀！一瞬間就血花四濺，他們都紛紛吟痛地退後......
「你...你係邊個...！！」手腳被刀舌觸吻到的倖存者，向我大喊。
我淡然地說：「走，我淨係要見到三腦。」阻止他們把「血酒」運走，頭目自然會逼不得已出來。
「三腦......」一名男子先握拳衝向我：「唔係你話見就見！」
我俯身避過，再把手術刀插入於其腋下：「垃圾。」
「嗚...啊...！！」他驚恐地按住腋下的傷口。
另一個倖存者亦上了前，想要對我使出飛踢，可惜他們的身法都實在太慢。我只需轉身避開，再順勢蹲下把手術刀刺入其大腿中，他已經大叫得幾乎要拆天，更幫我嚇退了其他原本正幫忙運著酒桶的人。
「你...唔可以...」那個叫老鄧的人慌張地張開雙手，想要阻止我入去大廈之中：「你唔可以隨便見三腦......！你呢種...平民、凡人、螻蟻係唔可以...！！」
我用雙節刀指住老鄧的前額：「唔可以？」
「你...絕對......唔可以見三腦！！！佢係比我哋更高級嘅生命體...你哋凡人係唔可以......」老鄧不斷叫喊。
我一手把老鄧推開，他狼瘡地跌到地上，面上的表情十分驚惶，就像深怕被別人知道什麼秘密般。
我進入到樓下大堂之中，望了望周圍，就步上樓梯間，一直上去。
途中，梯間一直傳出著淒慘的叫聲。
我不明白，他們面對火災為何只懂慘叫不懂逃跑，後來我才明白他們真正慘叫的原因。
而我即將要面對的，也是我從未想過的敵人。
踏上多級的樓梯後，我好容易地到達最上的頂樓了。
在我還未把防火門推開從而進入走廊的前夕，梯間上其實一直已經流著暗紅色的液體，我一眼就看穿，那是他們倖存區珍貴的「血酒」。
而我沒有猜錯的話，這裡就是他們的「血酒」工廠了。
整個倖存區最有價值的地方，大概就是這裡。
我不太清楚那個名為「三腦」的人，為何在這麼緊張的時刻仍然不選擇逃跑，反而獨留自己在大廈之中。
這一切都是我在徒步上去時，一直遇到運酒的倖存者，用刀子威脅他們吐出的。
他們每一個都統一地說，三腦在上方。
終於，到達頂樓的一層。
血腥氣味，最為濃烈的一層。
血酒近乎小泉河流般，從走廊滲出到防火門至到梯間這裡，都把的一雙鞋子弄髒。
我把防火門推開，隨即一陣血味湧入腦中，這層的走廊幾乎是個血地獄，滿牆滿地也是血液，如同河流般流動著。
我走到大廈走廊的中心，終於見到了這一切的真相。就算心裡已經有個打算，預計了自己會見到什麼樣的畫面，也沒來得現實見到的震撼。
一個染血的大浴缸安放在走廊中央，數十條以上的水管連住在走廊的牆壁與天花之上，但裡面流出的不是水而是血，血液毫不節制「虛虛」地從水管中流出到大浴缸上。
「嘎...嗚～噫噫噫...嘎嘎嘎...嘿嘰，嗄...」一個頭部極為巨大的人形生物，正背對住我啃咬著什麼。
人類，對未知的事物往往會感到畏懼。
而眼前的......
「嘿～」它似乎留意到我的存在，於是在大浴缸中轉了身過來：「你...好。」
它的外型我可以確切地肯定是病腦，不過比起一般的病腦，它更為怪異......
一般的病腦頭部已經夠大，
但眼前的它比正常的病腦，頭部更大出三倍。
就像，三隻病腦的頭加起上來一樣巨大，會令人感到了莫名的畏意。
「嘻嘰～？」它享受地坐在猶如血池的浴缸之中，說：「就...好似人類嘅...影視文...學作品，故事主角...喺呢種...情況下相遇...嘿嘿嘿......」
是隻...
會說話的病腦......
這一幕，對於以為敵人只是個人類的我來說，實在難以言語：「你係......病腦。」
「無錯～嘿嘻～！！」這次它的聲音不同於剛才，聲音反而變了電音般：「我...哋見到場火開始...就知...道，有人刻意想引...我哋......出嚟，所以我哋冇逃走......我哋...當然要似番主人......要你慢慢咁上嚟...嘎...」
「的確意想唔到。」我緊握住雙節刀。
「我哋...嘅真樣如此...顯露出嚟～就...會嚇到好多人......嘿呵呵，所以...只會同指定嘅傳話使者...見面、對話、發號使令，哈哈哈哈──」這一次，聲音又換了第二把：「我知道...你好奇......我聲音...點解會喺咁......變。」
「...」
「我哋唔同於...其他病腦......我哋統稱叫──三腦。」這個病腦，有自己的名字：「嘿...係生前擁有三個人格...嘅高智商人類......變異出嚟嘅品種喔...呵呵嘿......」
聽到這裡，我內心不禁打了顫。
居然......連自己變異誕生的詳情也這麼清楚，到底智力是有多麼的恐怖。
要讓大BOSS說出自己是如何出現，它是沒有任何印象的。
「既然係咁，你應該好清楚我嚟嘅目的......」我直接說出目的，且看它有什麼的反應：「仲唔逃走？」
我不敢輕易靠近，總覺得......
它能夠擺出一副輕鬆的姿態去迎接我，背後是有什麼詭詐。
何況它是智力極高的病腦。
「當...然清楚哦...嘿嘿嘰嘎啵......我本來仲浸緊血浴。」三腦邪意滿盛地對我微笑：「但係...直接走......就係落荒而逃...嘅蠢才......正中你...下懷同狼狽啊！嘿...倒不如......啵，喺到享受多一陣血嘅香味同溫暖。」
我打量周圍的事物：「有三個人格嘅病腦......」
「...就等於...嗄，三個智商係天才級嘅...生物，融合喺一個小小嘅軀體上......我唔會覺得自己...係比人類低等嘅生物...我同你哋......都係無分高低...嘅物種......或者更高階...嘿嘿。」三腦摸摸自己巨大無比的腦袋，繼續邪笑：「你...殺我嘅...目的係？我一直...都致力......推動病者同人類嘅和平相處...嘿嘿嘿...嘰，點解......要殺...我？」
「我哋人類殺你哋病者，唔需要任何原因。」我冷冷地說。
「咁...仲唔...埋嚟？係唔係......見到我...放鬆嘅姿態～覺得有古怪...呵哈哈啵...嘎～啦，冇事喔......」三腦它對我緩緩地招手，微笑：「入嚟......陪我...浸浴。」
「依個血池......」也是讓我感到詭異和心寒的東西之一。
「係喺各個樓...層用人血強行輸送上嚟......我覺得人類...嘅食物實在太難食...反而你哋與生俱來嘅肉體好香軟可口，血液又淳厚易入...口。順...帶一提...被我哋...拎去製作血酒嘅...人類......都係不懷好意...嘅倖存者，我哋冇加害過......好人...嘿嘿嘿。」咬著人類手臂肢體的三腦，對於「味道」有著一定的觀念。
「你手上咬住嘅手臂皮膚上面，出現咗過敏刺激反應，睇嚟你事先喺個浴缸落咗唔少毒。」我戳破三腦其中一項的詭詐。
「嘿...嘿嘿啵...嘰！哈哈哈...你觀察力好好，十分好......」三腦還是一副悠遊的神態，以電音竊笑：「不過...嗄......你手上簡單...嘅刀器都唔會...傷...到我...同埋......」
「啊呀──！！！！」忽然間，梯間那邊衝來一個人。
我立即把視覺轉向那邊，發現是剛才那個叫老鄧的人！
「冇人可以接觸神聖嘅三腦！！！！」老鄧拿著一根滿佈釘子的木棍揮向我。
我下意識地用手擋住，沒有為意到棍上那密佈的釘子，立時覺得手骨一陣劇痛。
「...！」我暗自咬牙，一腳把老鄧踢開。
「我忠誠嘅...僕人......呢到...就...交俾你......嘿嘿...嗖嗄...」三腦終於打算離開血池。
我才留意到，三腦要用爬的方式離開血池，離開後雙腳站地也十分不穩定，搖搖欲墜又緩慢的的走了去放在一旁的電動輪椅上坐下，才放心地對我展笑：「一直...以嚟......都冇人發現...過我嘅...真正身份啊......嘿嘿嘿，突然有人發現...我都好想......你可以嘎...但係......嘰哈哈...你發現咗呢個不可告人...嘅秘密......就注定要成為...池中物。」
說畢，三腦便控制住電動輪椅快速地離開，那老鄧則對我死纏不放。
「冇咗三腦......我哋就乜都做唔到...！」瘋狂的老鄧，握緊釘棍對我猛揮：「啊...啊呀呀！！！」
我接連地避開了老鄧數下揮擊，但一個閃避失誤，胸口還是被他無情地揮中一下，馬上出現心如絞痛的感覺。
眼看面前的敵人，已經毫不猶豫地要將我置於死地，那麼......我也有把他殺死的理由了。
殺人的這條界線，
一旦超越了，就會徹底改變人生。
第一次的結果，往往已經決定了最後的結局。
「嘶──」我利用雙節刀快敏地，對老鄧瘋狂劃斬。
人類溫暖帶熱的身軀，始終敵不過冰鋼帶痛的刀刃，老鄧在我不消數下的攻擊中，顯得無力反抗，加上我在刃身上塗了些少麻醉藥，他幾乎任我魚肉了。
「呯──」最後的一擊，我一腳把他踢到落血池中。
「呯噠～」老鄧掉到血池中，有點驚慌的望住染血漸黑的手：「我...點解......」
我對他說：「血池入面有毒。」終歸，只是間接地死在我手上。
「冇啦...冇啦冇啦......！！」老鄧瘋了地大叫：「我係咪會死呀！！！」
他，從來沒想過......
死亡，是多麼容易的一件事吧。
「冇估錯嘅話，呢到嘅酒都係用人血做原料？」我望向血池中的老鄧，反問：「你只係要還一條命，值哂。」
「我...我冇諗過...會就咁死嫁！三...三腦，無錯......」老鄧想要從染滿住血與毒的浴缸中爬出，卻無能為力地苦喊：「搵佢就一定無事...肯定有解藥......但點解......我隻手...同腳都好似郁...唔到...！！！」
「佢走得咁快，就預咗你係用嚟犧牲。」我小心地從血池旁邊掠過，打算跟上逃去的三腦：「蠢人。」
「冇...冇可能...佢係...我最值得信任嘅人！！呢個倖存區所有大小事務一向都任由佢處理...我幫咗佢咁多......佢點可以...點解會呃我......！！？」老鄧比起面對死亡，對於三腦的拋棄更為驚訝。
「對方係病腦，謊言呢樣嘢...只要學兩學你哋人類就識。」我停下步伐，說。
原本打算跟上三腦的我，轉念一想便停止追擊。
我怕，貿易地追上去會遇到更多埋伏的殺機。
「我好驚...我係咪要死......」在血池中，全身無力的老鄧口顫顫地問：「你...你可...可唔可以陪埋我...我唔想自己一個喺到死...陪...陪我講下嘢......」
我稍稍地轉頭，望向全身皮膚皆漸發黑的老鄧：「你都係病者和平協會其中嘅成員？」
「我...我係......我哋一路都置力推動病者同人類嘅和平...你到底...係咩原因要嚟放火......」老鄧答。
「單係你哋用人類做「血酒」呢一點，已經夠我俾理由放火燒哂成條村。」我說。
「佢哋都係不懷好意嘅倖存者......！」
「咁假如當中有誤判成份？」我不屑地說：「死之前就唔好咁多辯駁，你就直接講關於嗰隻三腦嘅事。」
一隻病腦能混入倖存區且擔當領導人，這情節根本是不可能發生，但偏偏就發生在這裡。
「嗚...嗚嗚...」此時半死的老鄧，欲哭無淚：「我呢...生人，最後悔嘅事......就係害咗咁多人，我諗都係時候...要還......」
我走到更近那大浴缸，俯視著皮膚已經近乎全黑的老鄧。
「嗰隻坐輪椅嘅三腦，應該走唔到幾遠......講一個我唔殺佢嘅理由。」我對老鄧說。
「三腦......」垂死的老鄧，就如訴說著走馬燈回憶：「我第一次遇佢嗰陣...係喺心朗村摘完果實嘅時候......我唔小心...俾附近嘅捕獸器夾到，個陣我得自己一個乜都做唔到......大熱天時又口渴...又流血，幾乎已認定自己死硬...大概半日之後...突然出咗一隻病腦......哈...哈哈就係三腦，佢用工具幫我撬開之餘...仲搵咗繃帶藥膏幫我處理傷口，我開頭好驚...但後嚟諗諗下......係佢救咗我。」
「...」我留神地聽下去。
「後來我發現佢識...講人類嘅語言...開始咗同佢溝通，」這些回憶，居然令老鄧勾起了笑容：「佢同我講...自己係不同嘅......舍名叫做「三腦」，佢主張『病者同人類應該和平共處』，我第一次見識到人性光輝......唔係...係病性光輝！！我好震撼...我冇聽過任何一個人類咁講過......但偏偏就由一個病者講出口，所以我決定用自己翠林倖存區幹部嘅身份，幫三腦喺區內宣導......」
「佢救你一命，你就捨身報答。」我說。
「因為......我喺三腦身上，更加見到領導人嘅影子！越相處得耐...先發現佢有好豐富嘅學問同知識，教我好多解決倖存區一般問題......例如淨水、自家式小型發電機要用到嘅材料同製造方法、檢驗食物安全嘅方法、紡織、維修，亦因為三腦所教嘅一切技術同意見......倖存區開始自給自足，唔驚無嘢食......而我都慢慢喺區內有啲名氣同上咗位，所以...」老鄧的笑容勾得更為弧線，畫面立即變得詭異起來：
「我同村中某啲幹部討論決定咗......秘密咁殺咗現任嘅人類領導人...然後接三腦返嚟，秘密咁擔任翠林邨嘅領導人。」
我心下駭然，退後了幾步：「所以......大部份嘅村民，都唔知道自己嘅領導人係一個病者？」
「哈，哈哈哈哈哈......」老鄧開始毒發起來，狂吐血水，含辛茹苦地說：「咳...！嗄...啊，有時...時候......知道真...相，未必...係好嘅......選...擇...嗄......」
繼而，老鄧斷了氣般，淹沒到血池之中，不見死相。
見老鄧已死，我便轉身面向它不久前逃走的方向前進。
這下子，我對三腦的背景更為了解些，或多或少在對戰時能有所作用。
跑到去後樓梯的我，還能夠依稀地聽到輪椅郁動時所發出的聲音，加上回音的確認，三腦大概逃到去第五、六層了。
我也不急怠慢，趕緊地追起上來。
直至我追到去地面後，在大堂見到三腦它已經往香港中文大學專業進修學院的方向移動。一路上緊握住武器手術刀的我，馬上拔腿追往。
從背後來看，我猜三腦的輪椅經過了改裝，因為無論速度或是扭力都比市面上見到的不同，而且椅背位置固定了一樽用意不明的瓦斯桶，輪椅周遭又接駁住不明的管線。
「嗄...嘎嘎嘎嘎啦喇喇～哈哈哈嘿嘿......好開心...第一次可以光明正大喺街上遊走，嘿嘿...」三腦開朗地大笑。
眼見周遭一團團大火，也能發出恐怖寒人的笑聲。
「嚟個了結吧。」我望住停在學校前的三腦。
「嘿...噫嘰嘰嘰...」三腦控制輪椅轉後面向我：「你係艾氏...皇室派嚟......嘅殺手？你就放我一命......做我反間諜...我可以幫你...擁有一切......幫你爬上嗰個倖存區...最高嘅位置...只要聽我講...。」
「然後到咗重要關頭，就好似老鄧咁毫無猶豫地拋棄？」我不禁冷冷地嘖笑一聲，說：「唔好引我笑。」
「難道...你就冇......同...病...者做過...朋友？」三腦伸出一雙手，想示意接納我：「我愛...笑，但唔代表......我係邪惡...喺呢個俾...人類歧視追殺嘅世界...笑......係我最低嘅權利，我同人類一樣開心就會笑...」
「我係有病者嘅朋友，不過唔會利用人體做酒、唔會暗中指揮派人刺殺人類。」我盯住三腦：「既然你都做得出呢幾步，咁你背後應該都有唔少我未睇得到嘅行為......」
「我...只係......想世界更加和平...」
「你嘅和平，」我取出大碼號的手術刀，衝刺上前：「係他人嘅災厄。」
這次，三腦沒有再逃，轉為按了按電動輪椅上的鈕鍵，輪椅兩旁隨即彈出兩把鋒利的刀片！緊接，它控制輪椅衝向往我。
原本想要上前奪它性命的我馬上有所停頓，面對那把安插在輪椅旁的刀片和它輪椅高速的行駛，我從袍中取了把比較輕身的手術刀往輪椅的胎子擲去。