「我都係走先......」貴華十分害怕。
「唔好走，有嘢益你。」王達尼向他單眼。
轉眼間，我們已到達位於新都城三期的一間咖啡廳。入面裝修及格局都十分通明，不過店子沒有坐滿顧客，估計是價格太過昂貴的關係。
「嚟，我要杯即溶咖啡，你要咩？」王達尼一坐下軟軟的沙發上，就問我。
「熱茶。」我答。
「老闆你呢？」王達尼又問貴華。
「我...呃...」
「就要件蛋糕。」王達尼幫他下了主意。
「蛋糕...」我望望價目表，蛋糕在寶琳倖存區中簡直是天價......
一件就需要上三、四百艾幣。
王達尼左手兩手，各牽住我們：「可能你哋當中有啲誤會，不過我都想你哋忘記。」他到底在打什麼主意。
「我...我忘記唔到......」貴華瞳孔開始收縮，彷彿回憶起什麼。
「其實叫貴華先生你嚟，我係想同你傾下生意，或者可以講做認識下你。」王達尼向貴華說。
「有咩傾？我以後唔會再信外面嘅商家......」貴華說。
「你每日咁遊手好閒周圍行，肯定好想做出一番大事吧。」王達尼說。
「嘻...」貴華彷彿忘了我帶來的影響般，自傲的神色又再回來：「其實我有時候都諗過嘅～例如起間好似咁嘅咖啡廳，睇落都唔錯！最近我睇緊一啲關於成功創業嘅書。」
「你都鐘意睇書？」我意想不到，會看那種重口味東西的人居然也有清淡的喜好。
「......」貴華不敢直視我，繼續望住王達尼：「俗語有話，一日不讀書言語乏味，三日不讀書面目可憎啊嘛，嘻嘻。」
「你仲鐘意睇咩書？」王達尼繼續問。
「未病變之前......我都幾鐘意一個作者，佢有一本書叫《背叛者》都幾好睇！」貴華說得開心：「可惜～皇政府已經列入做禁書名單之一，因為含有煽動政權嘅意味喺入面。」
「你想睇？我哋可以幫你搵到。」王達尼淺淺地笑著。
「係違禁品嚟！唔洗幫我搵！」貴華急說。
「交喺我哋身上吧，絕對幫到你搵個到想睇嘅小說。」王達尼拍拍貴華的膊。
「犯法嘢，我身為貴族絕對唔會做！」貴華斬釘截鐵地說。
王達尼靠到我耳邊，低語：「幫下口，生意係咁嚟。」
「你唔覺得與別不同嘅貴族好型？」於是我開腔。
「吓？」
「你係唯一做犯法嘢，睇犯法書嘅貴族，你唔覺得咁樣好酷炫咩！？」我反問。
「酷...酷炫！！？」貴華大驚。
「唔，講得冇錯。」王達尼點頭附和：「我一向覺得犯法嘅人係型到核爆，無畏咁挑戰政權，呢種男人萬中無一。」
「只係睇一本書渣喎......」貴華低聲說。
「已經好有型，連睇閱讀都要睇禁書，呢種叛逆嘅生活態度無人能及。」王達尼說。
「壞壞又帶點帥氣，呢種生活方式嘅男人係最型。」我說。
在你一言，我一語下，貴華的價值觀好像受到衝擊一樣，苦惱地細思著：「真係型咩......」
「當然。」我跟王達尼異口同聲地說，且舉起了姆指。
「咁...你哋搵唔搵到......《哈姆雷特》英文版俾我？」貴華身子傾前，低聲地問：「睇《哈姆雷特》好似比較高尚啲...」
「冇問題～冇問題，重點係要支付訂金先。」王達尼高興地攤出手掌。
「...要幾多艾幣？」
「二千吧！」
「二...二千！！？？」貴華又吃了一驚：「好似太貴！」
「你去一轉倖存區嘅木球會玩，都要洗百幾艾幣啦～少少錢老闆你唔會俾唔起呱。」
「蛋糕、熱茶仲有即溶咖啡，請慢用。」侍應把我們點的東西都拿來了。
「你連食件蛋糕都要洗成三、四百，睇一本書都差唔多。」
不能讓貴華有思考冷靜的空間，於是我又說：「先交訂金一千。」
「呃...」貴華慢慢地掏出一千艾幣，好像想要快點脫險：「噫...好啦好啦......」
「好！多謝你貴華先生，書一到手我哋會派專人通知你。」王達尼急急喝完即溶咖啡，就拉住我走。
一場突如其來的交易，就這麼結束了。
出去之後，我才有空對王達尼發問：「點解？點解要搵呢條友做生意。」
「佢咁鐘意炫富，應該都係個種覺得自己與別不同嘅人嚟，況且......搵呢啲貴族嘅水魚生意，仲好過出倖存區搵命搏。」王達尼雙手托在後腦：「喺倖存區做生意頂多會遇到守衛阻撓，但出到去就有機會遇到病者同惡意倖存者。」
「之後落嚟，係時候教下你走私嘅技巧，呢次就當係個經驗。」王達尼對我說。
「好。」我相信王達尼的經驗總比我高，應該會學到有用的東西。
他教我，走私非法貿易品的第一步就是剛才的行為，洞悉商機。例如先找一個適當的客戶，評估貿易品可尋的程度。
像《哈姆雷特》這種著名的外國文學書籍，是很容易找到的，可能只需去其他倖存區的賣書商人或荒廢的書局找找。
接下來，就要評估外出搜索目標物品的路線及風險。這一方面，王達尼在「詭區」的倉庫中，有個人是專家，她能好好規劃好一切。
「介紹你識，」王達尼把我帶到去「詭區」的貨品倉庫，介紹一個人我認識：「佢叫小老鼠寶拉。」
王達尼指住倉庫中，正點算著貨品的一位女生。她矮矮的、穿住黑色的冬季大衣並戴住了冷帽，感覺好凍的樣子。
「寶拉，我新拍擋。」王達尼想想如何介紹我：「就叫佢......黑鴉。」
「...」她望了望我，繼續點算貨品。
「咁我哋依家要做嘅，就係調查邊到有《哈姆雷特》？」我問。
「係，先搵下區內嘅書局先。」
說這麼多廢話，還是要直接去調查。
寶琳倖存區有住大大小小的書局，而且人流也不少，相信閱讀已經變成了亂世中的一種娛樂，或是心靈寄託。
如我們所料，一般書局都沒有販賣這本外國名著，因為屬違法的。
「應該要出去搵。」跟我找了一整天的王達尼，無奈地搖頭。
「新都城一期個間「哈姆雷特」，會唔會有。」我說。
「個間雖然係乜都有得買嘅雜貨鋪，但係都只會賣正常嘅嘢。」
「我係指，佢個名......咁啱都叫哈姆雷特。」
「係喎，可以去睇睇。」
「我自己去交涉吧。」對方是病者平權組織的背後支助人。
「你？」
「要信得過我。」說罷，我就徑自前去哈姆雷特。
「哈姆雷特」四字的霓虹燈，總能大刺刺地掛在店舖上。
大概，是跟瓦安身份地位有關吧。
「我要見你哋老闆，瓦安。」我入去之後，的第一句。
「見...老闆？佢去咗打木球，你等等......」職員禮貌地說。
於是，我在哈姆雷特中逛了一會兒，直至瓦安回來。
那時，已經是下午時分了。
「老闆...今朝有位客人搵你。」職員向回來的瓦安說。
「邊個！？」一貫咬住雪茄形象的瓦安，有點粗獷地問。
「就係佢...」職員指住我。
「喔......呵呵呵，係啊，後生仔。」瓦安似乎認得我。
「我有啲嘢想問你買。」
「哦～？」瓦安有點好奇，指住辦公室：「有咩入去先講～」
入到瓦安的辦公室後，他慢慢地走到「大班椅」上坐下，椅子就像要承受他沉重傾後的身軀，十分吃力地發出「吱吱」的聲音。
「小兄...你搵我咩事？」瓦安盯住我了：「記實我對你冇太大印象，或者你可以自我介紹先？可能我哋之前見過，不過好似我事業咁繁重嘅人偶然忘記一、兩個都唔出奇啊...哈哈哈哈。」
「你鋪頭有冇《哈姆雷特》賣？」
「哈姆雷特？嘿...小兄，呢到係犯法嘢嚟，我哋唔會賣。」瓦安回答。
「哼，虧呢到叫《哈姆雷特》。」我心中暗嘆，便轉身：「咁無事，再見。」
「等等......」當我把手放到門柄時，瓦安突然叫住了我。
「...」
「你點解想要呢本書？」
「單純想睇。」
「呵......仲以為你係想高價出售。」瓦安勾起貪婪的笑容：「其實，呢啲違禁品我總有幾本，始終呢啲違禁品可以炒到咁高價，我暗瓦底都收埋咗幾十本。咁啦～如果你可以幫我做一件事，我可以送一本俾你。」
「咩事...」我想，也不是什麼好事。
「好簡單，只係做個跑腿送封信。」瓦安慢慢地說出：「最近想搵個倖存者出去區外似乎有啲難～你咁啱送上門，嘿......如果你完成嘅話我就私人贈送一本俾你。」
「信...送去邊？」我問。
「好近，翠林邨～」
的確好近，離開倖存區後只要一直往西北走就行了。
不過地勢有點麻煩，去到之前需要行上一條數十分鐘的道路。
「我聽日俾個答覆你。」我還得跟王達尼商討一下。
沒想到的是，王達尼一口就答應了。
「當然得～我印象中個邊都有倖存區？但要上條坡太麻煩，又太近無乜距離收益，賣嘢嘅價錢同喺寶琳倖存區差唔多，所以我幾乎無去過。」王達尼指出真正的問題：「重點係......你點識瓦安？」
「就咁入去問佢有冇《哈姆雷特》。」我說。
「咁直接？不過對瓦安呢啲狡猾又圓滑嘅商人......最好果然係直接啲。」
「佢好似完全唔驚我係皇政府假冒嘅人，直接同我講有《哈姆雷特》可以俾我。」我抱手。
「以佢嘅身份同地位根本唔需要驚。」王達尼搖頭苦笑：「皇政府根本唔會為呢啲雞毛蒜皮嘅違禁品，而捉咗呢條友，冇咗佢......皇政府就好難繼續喺佢身上榨取金錢，個瓦安喺倖存區係有好多地產。」
「原來係咁，我無諗到呢點......」我點頭，說：「喺現實定係亂世，權力者都係互相包庇，只要有利用價值。」
「無錯～呢啲喺我以前金融業做到某個高位時，就遇唔少。」王達尼抽起一根煙，徐徐地道：「聽日做好出去嘅準備，我會叫寶拉整條路線出嚟。」
翌日，我先到了瓦安辦公室。
「你要我送啲咩？」我入去第一句便問。
「好～好好，」正在吃著早餐的瓦安，望了望我：「拎住。」
是一封信，不過信件開封口黏好了。
「就係一封信？交俾邊個。」我再問。
「去到個到，自然會有人出嚟迎接你。」瓦安抹抹嘴上的油跡，原來他剛才吃完火腿來。
在我臨走之前，瓦安又突然說：「其實我又點會唔記得小兄你～嘿嘿，你就係之前嗰個識得病語嘅人吧？」
「原來你仲記得。」
把瓦安的信拿走後，我就前去會合王達尼。
他的背包很大，應該裝了不少的東西。
他說，裡面都是一些能賣出去的無用物品，既然都要到其他的倖存區了，就順便一併賣走。
「準備好未，係時候......要入去令你滿身發痕嘅奇妙嘅隧道裡面。」在詭區中，王達尼試圖獨自一人把渠蓋拉開。
顯然地，有點吃力。
「...」忽然，小老鼠寶拉不知哪來的，走去協助他一把。
兩個人，四隻手用力一拉！便把沉重非常的渠蓋打開了。
「唔該哂～好助手！小老鼠。」王達尼想跟她來個擊掌。
但對方不太理他，只是冷冷一笑，低聲道：「哼，笑死。」
「......」我和王達尼都望住默默離開的寶拉。
「佢平時就係咁～」王達尼回到狀態，望住渠道下：「跳落去啦喎！」
「快，」我對王達尼說：「唔好搞到成件事好緊湊咁。」
然後，我們二人便跳到渠道之中。
入面漆黑非常，伸手不見五指。
但王達尼說他能夠摸黑前進，因為自己早已走過數十百萬次，因此即使地下無光，也能如常前進，透過小小渠道走出倖存區外。
我捉住王達尼的背包，一路跟住在他的身後，無聊地談起一些事情來。
「其實...如果我哋俾守衛做到，會有咩下場。」我問。
「冇人知，因為我從來唔會出錯。」王達尼說得輕鬆：「不過...聽聞係會派你去一個地方不斷消費你嘅勞力，總之就唔會俾你白白咁死。」
「呢個時代，物資雖然珍貴，但係我覺得人命應該更加珍貴......」
「嘿，好似你咁？一個小齒輪，破壞哂成個大裝置，你毫無異問...係一個出色嘅間諜，呃到好多人。」
「有時候謊言嘅背後唔一定醜陋。」
「不過值得一提嘅係，你依家已經努力學做緊一位成功嘅商人。」
「你邀請我入嚟......都好似係因為我對付病者嘅能力？」
「要轉職對你冇難道。」王達尼冷笑一聲：「嘿，反正你係個種一旦接受咗個到嘅逆境同規矩，就會盡量配合嘅人～不過背後肯定會耍啲橫手就係。」
「唔好講到自己好清高，你同我......都只不過係喺地下遊走嘅無賴。」我淺笑一聲。
我們兩個在幽黑中一言一語，不知不覺就到達可以離開渠道的位置了。
我們把離開的渠蓋也打開之後，就出到去陰風陣陣的寶琳倖存區外，位置大約在陶樂路那邊。
「上咗山，就到翠林邨。」王達尼一出來，便指住那高處的屋邨。
「行邊條路？」我問。
「寶拉俾我哋嘅指引......就係行上面前呢條山路小坡，一直上就到。」王達尼指住那隱密的山梯。
「事不宜遲。」我拍拍王達尼的背包。
天色依舊的灰沉，陰涼的薄風總是吹過不停......
從繁雜的城市中離開後，突然感到不太適應，那死寂的感覺讓人渾身打顫。
我以前是怎樣捱過來的？
人類，果然是一種群體生物。
「一陣你見到病者，會唔會自己走路先？」王達尼突然問。
「應該會，我手上冇武器。」我答。
「放心，我背包入面好多，可以做你背包助手。」
「背包助手？」
「即係...呃，啲主角要乜，個啲拎住大書包嘅配角都可以即刻拎出嚟個種角色。」
「你做開呢種角色？」
「以前我一般都會走路～有時候啲病者擋咗主要道路，我會被迫放棄交易，兩手空空咁返去。」王達尼搖搖頭，說：「話說，你有冇興趣...睇下瓦安封信，到底寫啲咩。」
「冇，我只係個商人，唔係探員。」管瓦安想幹什麼大事，也與我無關吧。
「哈哈哈哈，你啲好奇心去哂邊。」王達尼笑著說。
「好奇心害死貓，廢時又捲入啲要垂死掙扎嘅陰謀入面......我都已經，功成身退。」
「成功冇令你行前，反而令你退後...？」王達尼反問。
「退後，唔係因為害怕...係因為更加睇得清呢個世界。」我腦中回憶起不破尚，說：「其實世界上真係有分正邪？每個人都只不過係站喺自己嘅立場。有人大義凜然，可以為咗大眾而犧牲自己同伴；亦有人情義深重，為咗同伴可以不惜摧毀所有人嘅性命，世上本來就係一條灰色嘅界線，既然你唔知自己條線喺邊......就索性唔好踏入去。」
雖然不良人確實殺害了大本營的人，但亦因如此大本營才能活過來，將自己拯救不致白白等死。
「喔...」王達尼好像頭一次，如此認真地聽著我說長篇大論：「明白～不過記住自己係邊個就可以，同埋......在商一定要奸啊。」
不久，我們走完了那條上山坡路，經過那一小片的草叢，走到寶琳北路上，現在只需一直沿住馬路走就能到達翠林邨了。
「差小小就到啦～希望唔好遇到乜嘢麻煩啦～」王達尼伸個懶腰，眼角瞧到了路邊一部相機：「咦？等等，有正嘢。」
「相機？應該都冇電。」我說。
「冇電都可以放出去做電子零件嘅......」王達尼放在手中，仔細觀看：「喂...仲有電喎。」
「係？」我走過去望望。
「邊個傻仔隨便放部相機喺到......」王達尼望望周圍，繼續對著相機亂按。
直至，他按到觀看以往相片的那一項。
「有相睇...？」我也投入到相機當中。
「睇下......好一般，都係影病者嘅相。」王達尼看著相機的照片。
「睇最近期個幾張，係前兩日嘅事...」我看到日期那一項，是如此說明。
「下一張～」
「...」我瞳孔稍為擴大了。
「有嘢...？」王達尼見我面色有異，便問：「冇乜嘢啊，只係影兩個普通人。」
「佢影嘅呢兩個唔係普通人......」
「吓？」
「係北賢同南愚......」我認得，他們的外貌。
北賢豎立的頭髮，南愚厚肥的肚子。
「呢兩個咩人嚟...」王達尼深入地問：「呢個角度點睇都係偷影喎。」
「睇多幾張。」
之後那幾張，都是以偷影的角度拍攝北賢與南愚，位置大概就是在這條上坡斜路，偷拍著他倆的背影。
還有一張，是北賢與南愚突然停下，沒有走路，
最後一張，便是他們頭有稍稍向後，以危險的眼神盯住攝影師的模樣。
「哇...」雖然沒有嚇人的畫面，但王達尼還是被畫面的不安感弄得愣住了：「希望......個攝影師仲人在安康...」
「我可能識得呢條友...」我看到這名攝影師過往的照片，有著雨川之前給我的病者照片，即是那個廉價賣病者照片給我的人。
他正正可能是相機的主人。
「係？」
「不過......」我有點不安地，盯住那些照片：「佢永遠只會影病者...唔會影人。」
「代表啲咩，我啲雞皮開始嚟料......」王達尼身子打了個顫。
「代表...」我閉目想想，說：「繼續行吧，我暫時都唔想諗住。」
「咁部相機啲......」一開始把它惜如珍寶的王達尼，如今只敢用兩隻手指僅僅地握住機身：「好邪氣喎...！」
「帶住吧，總有用途。」我望住王達尼，說：「背包助手。」
儘管發生了小插曲，我們還是得為錢而繼續前進。
但這是代表，南愚與北賢都前去了我們即將要到的翠林邨嗎？那個叫雨川的攝影師，他現在人又在哪裡。
「叮嚀叮嚀...叮嚀叮嚀......」不知名的鈴鐺聲。
「咩聲...」王達尼望望身後的斜路，沒什麼異樣。
「叮嚀...叮嚀叮嚀......叮嚀...叮嚀...」持續地出現。
「做好跑嘅準備...」我警惕住四方。
「咁你幫我拎住先......好重啊！做咗咁耐背包助手。」王達尼辛勞地說：「一陣我跑唔郁就大檸樂...」
「拎嚟。」我把背包接過。
就在我們交替之時，斜路下的轉角終於出現了鈴鐺聲的主人。
「叮嚀...叮嚀叮嚀嚀......」
我和王達尼一同望向斜坡之下，發現鈴鐺主人是以四腳爬行。
看到這裡，也不用看其長舌......我們已經馬上轉身動腳開跑。
「臨尾先嚟交啲咁嘅嘢...！」王達尼大喊。
「差少少就到！跑埋佢！」原來王達尼的背包，是多麼的沉重啊。
「舌女啊！」我也是頭一次看到王達尼遇到病者的反應，沒想到那麼誇張。
「你有時間大叫...不如留啖氣去跑......」我邊跑邊說。
「你有時間同我解釋留啖氣跑......不如快啲跟上步伐！」沒背包負擔的王達尼已經超前我幾個身位。
「你有時間反駁我嘅解釋......」我望住前方的他，喘了幾口氣：「不如...試下幫輕我！」
「你有時間......」王達尼說到一半，嘆了口氣、回頭：「一人拎一邊！」
我們各握住背包一條帶子，打算各分一邊的力。
「叮嚀...叮嚀...叮嚀...叮嚀......！！」
可是，身後的那隻舌女追得太急了！而且就近一看，才發現這隻舌女四肢都被紮上了一些金屬鈴鐺，明顯地被人刻意紮住過。
「邊個變態仲幫佢著換埋件婚紗著啊！」王達尼望住身後的舌女，的確穿住了一件殘舊的婚紗。
「棄啦！」我握住背包的手鬆開了。
「嗄...唉！命仔要緊！」王達尼也豪邁的把背包扔下。
最後，我們兩人在大直路上發力直衝，好不容易地跑到去倖存區的大木閘外了。大木閘是用木材搭建而成，有一個小哨塔能夠觀視前來的人。
「開門啊！」我們一同拍著大木閘。
「兩位係？」站在哨塔上的人，還不急不緩地問。
「後面隻舌女追得好近！！放我哋入嚟先......」
之後，倖存區入面的人把閘開放了給我們，並在舌女趕到之前及時關上。
「啪！啪啪啪──！叮嚀...叮嚀......」它瘋狂拍門的聲音，及鈴鐺聲。
隨後，那隻特別的舌女好像洩氣了，選擇離去：「嘎...嗚...嗚嗚...嘰嗤嗤。」
「嗄...嗄......嗄...嗄...嗄......」我們都按住雙膝，在入面喘著大氣。
「歡迎兩位，你哋係嚟自......」開閘給我進來的人，問。
「寶琳...」我喘住氣說。
王達尼替我說下句：「嗄...倖存區......」
「喔，你哋嚟嘅目的係？」
「交一封信俾你哋，瓦安派我嚟......」我從袍袖中，取出信件。
「我得番部爛鬼相機......」王達尼像是生意失敗般望著手上僅有的相機，顯得一面沮喪。
「瓦安！？」開門給我們的倖存者，看上去十分高興：「咁即係你哋係自己人，好，請你哋戴上金屬扣章先，等我哋自己人可以識別到。」
突然，他給了我和王達尼各一個有圖案的金屬扣章，讓我們扣在衣服上。我的扣章圖案是病翼的可愛版樣子，而王達尼的金屬扣章則是竊屍賊可愛版樣子。
「守寡舌女應該仲會喺外面一陣，暫時唔會離開，你哋就喺到行下先，可以自由活動。」那人交代完之後，便離開了。
「搞乜...小學生活動啊。」王達尼口裡這般說，但還是扣上了。
「跟住做先，每個倖存區都有佢嘅規矩......」我說。
戴上扣章後，我們才能自由自在地在該區活動。
「外面個隻舌女啲鈴鐺聲...仲係陰魂不散咁款。」王達尼憂心地按眉。
「喺到留一陣，我諗一陣就會走。」我望望天色，時間尚早。
並且，在這裡我們也許能夠找到南愚與北賢二人，或者相機的主人雨川。
「話說......相入面嗰兩個人，係乜水嚟。」王達拿低頭凝思著相機。
「南愚北賢，有冇聽過？」
「以前喺酒館聽過一個倖存者講...好似都係類似嘅名，我唔記得啦，個陣有啲醉。」王達尼與我步入到倖存區內，繼續問：「好似話係情報專家，幾乎問佢乜都知？係咪，你好似識佢哋咁。」
「唔，」我點頭，說：「大概，關於佢哋嘅...其實我都唔係有太深入認識，只係以前大本營有個叫三賴嘅老師講過下，至於佢哋點解乜都知呢一點......我都唔清楚。」
「重點係......」
「佢哋可以當條街係屋企咁行，好似完全唔怕病者。」我心中的一個問號，當初已經懷疑。
「嘛嘛～入去搵間類似酒吧嘅地方再慢慢傾。」應該比任何人都頹氣的王達尼，拍拍我的肩。
感覺上，只要見到了南愚與北賢之後，就會把一些問題迎刃而解。
這個倖存區相較於華燈璀璨、人聲鼎沸的寶琳倖存區來說十分平淡，或者應該說是樸素。地上擺賣的小販居多，賣的都是趣緻卻簡單的事物。
「呢個木雕......」王達尼停在其中一個攤位前，蹲下、拿起件雕功精細的作品：「都幾靚。」
是用木頭雕成「舞者」模樣的藝術品，而販賣的婆婆是個年紀也將近八十的老人。
我又看看其他小販的攤位，有些賣香水、有些賣書本、有些賣畫作，但大家叫價沒寶琳倖存區那般激烈，反倒是一種輕鬆的心態去坐著等人買，空閒都只會坐地望天打掛。
「呢到話係倖存區，倒不如......話係一條寧靜、又平安嘅村莊。」我返回到王達尼身邊。
「係，佢哋都好輕鬆咁款。」過往我們所見的不是裡藏住複雜的人性，就是殺戮的血意。
「繼續周圍行下。」王達尼放下木雕、站起身。
「我發現...呢到嘅藝術產物，多少都同病者有關。」我現在的焦點，放了在一個沒有人管理的攤位上。
那裡擺放住幾幅繪畫病者的畫作，由最容易的大眼至到形態最凌厲的病爪也有，只是有一幅更吸引我眼球。
那幅畫作繪有病爪與人類，不過並不是互相攻擊對方的殘暴畫面，而是生活在同一個小地方，和諧非常的畫面。
「嘖...」王達尼盯住畫作的內容，冷笑幾聲：「大眼同人類嘅小朋友玩、病腦同人類喺學校上堂、舞者同年輕嘅少女一齊喺廣場跳舞......邊個天才諗得出呢啲畫面仲要畫埋出嚟。」
走完整條小販攤路後，我們都被鄰近學校門外一名說書人吸引到，圍觀過去聽的人不少，當中小孩佔很多。
「今日要講嘅，係「三腦創世」故事！」說書人，是個年近四十的身瘦大叔。
「好嘢！」、「上次聽過啦......」、「再聽再聽...！快啲開始！」小朋友們都有十多個。
「睇嚟會好有趣......」王達尼淡淡勾起嘴角，走近過去。
只是入來消耗下時間的我，也無妨過去聽下。
說書人開始用著高低有序的腔調，說著故事：「話說呢，世界以前就係一片戰爭，各種問題充斥住我哋人類！衣食住行啊，樣樣都唔掂，終於就爆發咗戰爭！呢個時候，天上派嚟三位使者，三個病腦幫助人類，但我哋人類就唔鐘意人幫，覺得佢哋係外星人就打走佢哋，最後好唔容易！三腦終於同人類嘅首領達成和平協議，令世界回復平靜。」
「我要聽...」一位只有六歲的小朋友不斷舉手、跳高：「我要聽...！我被寄宿到病嘴家中嘅故事！」
「好啦，小朋友，嗰個故事我聽日先講好唔好！？」說書人笑問。
「唔好！」小朋友們搖頭。
「好啦，咁聽日再講啦！」說書人叔叔揮揮手：「再見，大家返去食午餐啦，去同朋友玩啦。」
「乜鬼...」王達尼有點無言，說：「仲以為啲故事有幾緊湊......」
「俾小朋友聽，太暴力太血腥唔係太好。」我能理解。
一陣涼涼的微風，吹過我的髮肩。
我當頭望天，剛才前來時的陰沉烏雲都消失不見，反而久違的藍天與白雲正有展現在天上。
「呵欠～」王達尼搖搖頭，說：「呢到環境太舒服...有啲想訓。」
「我見到有間類似酒館嘅地方，入去？」我指住不遠處，位於商場二樓的一間店子。
「最好最好～快。」王達尼率先過去。
就算來到此等純樸涼靜的地方，有著欣賞晴朗天空的心情，但我們還是自然地回到自己應該歸屬的地方──酒館。
這是所謂的江山易改，本性難移？
「老闆，有咩平平哋又好飲嘅酒啊！」王達尼一入去，便選擇坐到酒吧檯上。
毫無疑問，這是跟酒保搭熟的方法，亦是詢問倖存區情況的好機會，王達尼的小小舉動，其實都充滿住金錢的氣味。
「呵呵～要血腥瑪莉？定係香甜嘅水果酒或者刺激嘅蜂蜜酒？」穿著像個正牌美國牛仔的胡子老闆，善意地笑住說：「個人推薦就有最受歡迎嘅「紅酒」，要試下？」