第055章

第055章

「黑袍老師應該要去同老賢報告先,」大舊讓瑜小六也跟過來:「小六,你都嚟埋。」

「老...賢係...好得高望重嗰個......!? 」小六瞪大眼睛。

「唔,」大舊點頭,說:「我有感覺你未來都會係搜索隊一員,所以呢家見老賢就差唔多。」

於是乎,原本只需我自己一個的回報,就變了三個人一起前去見老賢。一路上前去老賢的房間時,可以看得出小六有點緊張,也是理所然的......

老賢平日足不出戶,聲望又祟高,身為大本營普通的小人物即將可以見到他,難免會緊張起來。

如果可以,我真的不想前進,停留在圖書館的落地大窗前凝望住澄空上的繁星。當城市都失去光的時候,世界取而代之的給你另一種光。

夜幕像條無比寬大的毯子,滿天的星星像是綴在這毯子上的一顆顆晶瑩而閃光的鑽石。

「老師...?」大舊望住身後,停住不前的我。

「冇,」我低頭,面具之下淡笑:「俾個天吸引住。」

待我們去到老賢的書房前,大舊便想要敲門,但聽到裡面正傳出喋喋不休的爭論聲,便先停住了手,安分地站在門外等候入面的人會談結束。

「老賢...!」說話的人用力拍了一下桌子,聲音聽上去是一位硬朗的女漢子:「我哋必須救...遲多一陣,佢哋都會面臨比死更慘嘅折磨。」

「江子千隊長,我知道你救人心切,但都必須考慮到大局嘅情勢。」老賢一貫不急不緩的語速,淡定地說:「營救地點路程唔係近,而且有「不良人」坐守,我哋輕則你嘅小隊之中會有人命傷亡,重則...大本營會同不良人更加交惡,到時不斷受到騷擾。」

「老賢,佢哋會將個班女仔捉去做性奴,或者賣去俾其餘嘅人去勞役,我係絕對唔會容許依件事發生。」名為江子千的女隊長,沒有絲毫退讓之意。

「你哋04小隊,「克里絲娜搜索隊」係大本營出外搜索唔可以缺少嘅菁英份子之一,任何事都要先以大本營人嘅利益,作為基準。」老賢溫厚地說。

「呵,原來係江子千。」大舊笑了笑。

「大舊Sir,佢就係......」小六都聽得到,對方的身份了。

「無錯,佢就係大本營入面全女搜索隊嘅隊長──江子千。」大舊搖一搖頭,說:「呢個人啊......係個超級女權主義者。」

「我否決,你申請出去嘅要求。」我頭一次聽老賢拒絕別人外出。

「你呢個決定係錯...」那女的說畢,就轉身用力推門出去。

「咔」門開了,這位叫江子千的是個外觀強硬健朗的中年女人,其灰白如同男生的短髮及不言苟笑的輪廓,可以看出她是一位十分有個性的女強人。

「啊...子千,咁快同老賢傾完...?」大舊被無視自己的她,撞到了膊頭。

「係。」她邊行邊說,心中顯然有點不憤,但沒表露於臉上。

「咁啱我有位未來新隊員介紹俾你喎!」大舊呼喊住已經跟自己隔了幾十個身位的她。

「邊個?」江子千停下來,眼角稍稍望住後面。

「轉身睇下。」大舊搭住小六的肩膀。

江子千轉身打量住我,但顯然望錯人。

「唔係長頭髮呢位老師,」大舊無奈地瞇眼瞇嘴成一直線,拍拍小六的膊:「係呢位紮馬尾嘅。」

「哦...」江子千轉為打量住瑜小六,良久說:「身材幾好,同埋隻腳幾長,不過我哋小隊唔收花瓶,你應該清楚?」

「放心,小六佢絕對唔係花瓶~!黑袍老師,係咪啊。」大舊說。

灰白短髮的江子千又點點頭,說:「我哋克里絲娜搜索隊,收人要求好簡單,一,係女人、二,有一定身體質素同經驗、三,誓死捍衛女性生命同權利,達成要求?」

「小六?」大舊輕輕推她背脊。

小六愣呆一下:「呃...唔,達成。」被大舊一推回神後,答。

江千林點點頭:「唔......咁有時間就落嚟B橦二樓搵我,我哋「克里絲娜」小隊嘅地方喺個到。」

說罷,江子林便回頭離開,十足個大忙人。

「咳...咳,你哋搵我?」老賢聽到門外的聲音,叫著門外的我們。

「嗯,老賢。」大舊一對住老賢,語氣又變得尊重起來,沒剛才朋友相對的語氣:「帶一位表現出色嘅學生你見下,佢叫瑜小六,喺我嘅「防禦學」入面,最高分嘅學生。」

「喺「攻擊學」入面,佢都係最高分。」我淡淡地補充一句。

「嗯...瑜小六。」老賢伸出一隻手:「歡迎你,即將為大本營貢獻。」

「嗯......!」小六恭敬地彎腰、握手,就好像見到地位崇高的長輩一樣。

老賢托一托圓框的金絲眼鏡:「介唔介意俾我知道,你願意為大本營付出嘅原因?我相信......每個肯為大本營獻出心臟嘅人,都一定有佢嘅原因。」

「因為......」小六低住頭,雙手搭住放在前:「M。」

「呢個女啊...好鐘意佢。」大舊感嘆一聲。

「咁我可唔可以,知道下當中嘅原因?」老賢言論之間覺得有趣,望了我一眼,便問。

「我父母...同細佬,係死於病者手上。」瑜小六繼續低住頭,說出自己的感受:「個陣時我哋一家喺另一個倖存區到住,直至有一日病者突然衝哂入嚟...我媽咪俾一個趕住逃走嘅人推開,一推就發生人踩人事件...我阿爸立即返去睇住阿媽,叫我同細佬走先,後嚟...我後佬又為咗保護我......而俾一隻舌女襲擊,最後走得到嘅只有我一個,我叫身邊任何人幫我...都無一個人肯,好無助...我以為我哋呢一世都唔會贏到病者...」

「對唔住,勾起你悲傷嘅回憶。」老賢溫柔地致歉。

小六擦一擦眼角,說:「之後喺轉折之下......我入咗大本營仲認識咗M,知道佢係一個經驗豐富嘅病者獵手,我發現佢同我一樣都係無家人...不過佢同我有一點唔同,就係會沉默咁對付病者,我好佩服佢。」

「好可惜,最後係充滿遺憾嘅故事。」老賢望住我。

「所以依家...我只希望可以繼承到佢嘅意志。」小六堅定地望住老賢。

「相信佢聽到,一定會好高興你嘅決定。」老賢點頭,如同慈祥的老人:「歡迎你嘅加入,小六。」

「係!」小六恭敬地站直身子。

「唔...」大舊滿意地點頭,說:「咁小六,事不宜遲,去訓練一下先!雖然子千話你有去面試入小隊嘅基本要求,但入唔入得成做正式成員,都仲要先接受佢三個嘅試煉......先加入到佢嘅菁英搜索隊,先訓練一、兩個星期再去吧!」

接著,小六和大舊二人就離開這裡了。

「終於,」我盯住老賢,說:「可以講番正經嘢。」

「頭先嘅事對你嚟講...係唔正經?」老賢反問:「一個亭亭玉立嘅少女,為咗你而想要考入全大本營最精銳嘅女子搜索隊,為大本營付出。」

「不值一提。」我每次行動,都幾乎是拿命來賭注。

「咁你值得提嘅事係?」

「你認識......」我盯實老賢雙眼,試圖看穿他的秘密:「一個叫滿天嘅人?」

「滿天?」老賢抬頭閉眼地想了想,答:「認識。」

「...」

「佢係「不良人」入面嘅爪牙,被稱為「不破尚的左手」。」老賢說。

「不良人...?」滿天曾經不是大本營的人嗎......

他連老賢專屬的果汁糖也擁有...

「雖然我經常都坐喺書房入面,不過外面嘅情勢,經常出外嘅少佐都會回報俾我聽。」老賢留意到我深疑的表情,便再說:「如果你唔相信嘅,可以去問下少佐或者賴三,佢兩個都比較清楚外面嘅局勢同聲名注目嘅人物。」

老賢這麼一說,我之後真的去找了賴三去問,關於「滿天」這個人的資訊。賴三亦毫不隱瞞的跟我說:

「滿天...佢作為「不良人」入面不破尚嘅左右手,曾經喺外面獵殺過唔少大本營嘅搜索隊成員。」

「佢係不良人......」跟我所認知的,有出入。

難道滿天刻意對我隱瞞了?

「你好似有啲懷疑咁?」木訥的賴三也懂得看人眉頭眼額:「或者你可以去C橦三樓木材加工室,問一個叫傑夫丸嘅人,佢小隊曾經喺滿天嘅襲擊之下全滅......最後得佢一個生還。」

我就如同揭著一本充滿謎題的書一樣,越揭,真相就越撲朔迷離,越是不能停下翻揭此書。

所以我把Dr.D需要到的病嘴、病牙身體部位交給他之後,就開始把專注力放在此事上。

「滋滋滋~~~~啪啪啪!滋滋滋~~~啪啪啪!!」C橦的三樓,整層都響亮著機器的雜音,十分煩人。

應該說,整橦C座大樓都是大本營的「加工業」地區,什麼衣物紡織、武器製造

、病者陷阱、電子零件、廢物再用、燒焊、木材加工及維修等,通通都在這橦大樓進行。

大樓的主管是誰不清楚,感覺上管理得很不錯。人們都手握住工具,在各層房間出出入入、來來往往,看上去很煩忙,應該是勞動力最高的一區。

「喂,阿明!搬好啲塊木板啊,啱啱刨靚嫁!」、

「阿雪,有冇啲碎布借嚟啊?」、

「一陣要派人去幫八樓班畜生道鐵閘到維修,仲有董倫佢間高級妓院要人幫手固定好掛喺牆嘅畫作,大強同健少你兩個一陣去幫手啦~」、

單是無意中聽到這裡的人對話內容,就知道C樓的人每天真的煩忙得緊要。

巧合地,給我遇到了一段時間沒見的黑商,王達尼。

「喂~真係幫唔到我加工下?」王達尼追問住一位穿住鐵匠服的老師傅。

「大佬啊,你呢條紅寶石頸鏈又要打磨、又要切割、又要拋光,咁多工序好煩嫁喎。」對方回答。

「我要送俾一個人啊嘛,緊係要心意重啲啦。」王達尼無可奈何的樣子,說:「最多~請你食幾枝煙啦。」

「係咪啊?你條友出名古惑嫁喎......」鐵匠老師傅猜疑地說:「你都知你有個稱號叫黑商嫁喇......」

「我係古而不惑!」王達尼從口袋取根煙,放到鐵匠師傅嘴邊、點燃:「嗱,吸番啖精神哂未?」

「少少啦~你個狡猾仔,整嚟送俾邊個啊!呢個時勢送枝水俾人都好過送乜鬼紅寶石啦!」鐵匠又說。

「關你鬼事咩~」

我就站在一旁,望住二人的對答。

鐵匠接過紅寶石頸鏈,說:「一陣識醒就帶多幾枝煙嚟俾我過下癮~知唔知啊,阿古惑仔。」

「得得得~你係大佬,聽哂你講。」王達尼拍拍對方的胸口保證。

談好之後,鐵匠便像個大爺的徐徐離去,王達尼則收下了剛才的笑容,轉頹的對鐵匠背部說了句:「痴線~」

待王達尼轉身的時候,他便注意到我了:「哇...!你幾時喺到嘅?啱啱都唔發現,有少少嚇親。」

「一陣企咗喺到。」我答。

「嚟工坊做乜啊?」王達尼快速地上下打量我一眼:「呢啲生活手作小地方唔似你嚟。」

「要調查一件事。」在他面前,我說話總能沒有顧忌。

「又查啲咩啊~」王達尼淺淺地笑,走到走廊的欄杆前俯視住大本營:「上次就董倫,今次工坊呢到得罪你啊?」

「你睇落好似好得閒......」我雙手擺在欄杆上,說:「咁得閒叫人整啲奢侈小手作。」

「錢賺夠就當然要洗下~」王達尼搖搖頭,說:「你第一次嚟呢到?」

「...算係。」我斜盯了他一眼:「你咁清楚?」

「C樓不嬲喺全大本營每日最忙碌嘅地方~個個都忙到踢手踢腳,得你一個好似尊佛咁企喺到~咁得閒聽人講嘢,仲唔係第一次嚟?」王達尼觀察挺入微。

「我其實要去木材加工場,不過就咁睇落......」我望住那只得機器與工具,卻空無一人的加工室:「似乎一個人都冇。」

「喔~班友可能去咗集體叫雞呱,董倫七樓間會所聽講已經改裝好。」王達尼打趣地說:「想參觀下?」

「嗯?」

「你都冇理由企喺到等到佢哋食完飯返嚟呱,周圍行下參觀下~?」

「我對董倫揸旗嘅地方冇乜興趣......」

「我唔係講緊董倫間私人會所,我係話呢橦工坊。」王達尼怎會這麼好人充當我的免費導遊?

不過...

既然我對這橦大樓一無所知,

就儘管參觀一下吧。

之後,王達尼就開始帶領我參觀這橦繁忙的工業大樓。

他說,每隔幾天都會有搜索隊成員陪同工坊中處理木材的木工出外砍木,經加工製作之後,能有不同的用途。主要用途包括,製作照明的火把或用以取暖燒烤的營火,昂貴一點則製造為可放在宿舍中的木製傢俱。

「每日都有人刨木、劈木、割木?」我橫視了他們的工作室一眼,很是專業。

「係~你真係當啲木伸手就有咩。」王達尼搖頭輕笑,說:「之後下面嗰一、二層就主要係紡織室,所有同布料相關嘅嘢都會交哂呢到處理。」

「好多女性...」我跟王達尼經過一樓的走廊時,已經有不少捧住布料、布碎的女士掠過身邊。

其中有間織衣室,更是放滿住數十多部缝纫機,每個女人都在專心地缝纫著布料衣物,感覺回到以前六、七十年代的工廠時代。

忽然間,整座大本營好像活過來一樣。原來也有一群人,是每天默默地努力工作,維持住營內的發展,不是每個留在營中的都是廢人。

「見唔見到......」王達尼悄悄地走到缝纫房的窗外,指住第四行的其中一位清純少女,正織著圍巾之類的物體。

「見到。」我說。

王達尼淡淡一笑,不經意流露出公子哥的瀟灑:「只有佢,先配得起我條紅寶石頸鏈。」


正在加載第056章
文字
背景
默認
白色
米色
灰色
淺綠
綠色
深藍
黑色
共0章
  1. Loading...