兔子人五隻手指幾乎深陷插入到我小腿肌肉入面，好彩係依一斬嘅波動成功幫自己解圍，好似驚退咗兔子人。
我把握呢個機會發力游返上水面，泉叔一見我上返嚟，即刻拉我到池外。
「啊嗄......下面有兔子人！」小腿傳嚟麻痺嘅痛楚。
「我見到......池下啱啱亮咗紅光。」泉叔拎獵槍瞄準水面。
水面靜靜泛起漣漪，一把由喉嚨深處發出嘅詭異怪聲喺池底傳出，然後水面露出咗一隻兔子人，佢同我一樣渾身浴血，大兔耳低垂住掩蓋自己面目。
泉叔唔輕舉妄動開槍，只係留意住兔子人一舉一動。
兔子人搖搖欲墜咁慢慢行近我哋，我都即刻拎起八赤刀警戒，
兔子人忽然撕叫咗一聲！！！！
「呯！」泉叔毫不猶豫地，開咗一槍。
「佢要攻擊我哋喇！」泉叔大叫。
我拖住負傷嘅腳，企喺泉叔前少少嘅位置，喺兔子人衝過嚟嗰陣一下快砍斬落佢身上！
「嗖！」觸發效果，被斬嘅兔子人傷口湧滿藍色火焰。
「呯！」呢一槍，泉叔打甩佢大門牙。
「嗖！！」我繼續上前補刀。
最終，呢隻兔子人發出哀怨嘅叫聲，猛地跑向我哋放低復活蛋嘅地方，然後全身一撲壓碎大部份復活蛋......
「咔嚓！」
「呀啊啊啊啊！！！！！」我當下怒不可遏，跑過去用八赤刀猛向兔子人身體亂插！
直至佢全身佈滿業火，被燒毀到一動不動，
泉叔先拉住我，回復我理智。
好不容易救返上嚟嘅三十幾個靈魂......
因為兔子人咁樣一壓，
淨低三個。
我推開兔子人燒焦嘅屍體，試圖從所有碎裂蛋殼中尋找繪有Chloe樣子嘅復活蛋，只希望自己會搵唔到。
「喂......啱啱我哋殺咗隻兔，後山入面有個兔子穴，入面有隻兔人。」泉叔將情況回報俾教育營嘅佢哋聽。
「有冇受傷，同埋有冇發現？」隔咗幾秒，宋文德回應：「我哋都整甩咗佢幾隻牙。」
「皮外傷，我哋搵到一堆復活蛋。」
突然，對講機傳嚟重生會導師嘅大叫：「啊啊啊啊！！母體體無可能會死！！！」
「佢講咩？咩母體......」泉叔聽到佢講。
「唔清楚，我再問下。」宋文德對我哋講完後，繼續盤問導師：「母體？聽落我朋友已經將佢殺咗。」
導師竊笑著，唔作任何交代。
「......Chloe唔喺到。」
我仔細咁睇過每一塊碎裂嘅蛋殼，無一塊有佢嘅特徵。心情一下子百感交集，有喜有悲，喜嘅係呢堆被壓得魂飛魄散嘅靈魂入面，無Chloe存在。
悲嘅係，我仲未搵到佢。
「政，係時候走，帶埋呢三隻復活蛋。」泉叔說。
「係......」正當我諗住離開嗰陣，我覺得有啲奇怪。
所以停咗一停。
「做咩事？」泉叔回頭望住我。
「點解，隻兔人好似燒極都未完咁。」我盯住隻兔人嘅屍體。
上次泉叔嘅徒弟被我斬殺之後無耐，屍體就完全被燒成灰燼，一點不餘。
但今次，呢隻兔人仲燃燒緊。
青藍嘅業火，仍未停止。
再加上剛才重生會導師所言，令我有些疑惑。
「我要確定下，佢係咪真係死咗。」我行過去，做出斬首姿勢。