「咁你覺得，佢哋點解俾兔人殺？」
「兔子人只會吸食靈魂狀態下嘅人類，如果佢哋單純咁殘殺對方，咁可能代表......嗰啲人誤闖咗佢哋地盤，佢哋為咗保護食糧，而將人殺死。」
「咁即係......呢到有機會可以搵到Chloe！？」
「唔肯定，兔子穴唔係得一個。」
我都知......
兔子人唔係得一隻。
行到去應該係最入嘅位置，嚟到一個比較空曠嘅洞內，我哋照到有個水池。嚴格上嚟講，唔可以稱為水池，而係叫「血池」，因為成個池都係血紅色，而且發出陣陣嘅濃烈味道。
泉叔行近血池，伸水往池內一摸，持續凝視住個池好幾十秒......
「泉叔？」我叫住佢。
「嗄...！」泉叔突然向後一坐，好似掙脫咗啲咩咁：「好龐大嘅靈魂數量喺入面，我差少少把持唔住......」
「你啱啱想......」
泉叔吞一吞喉，向後退：「阿政，我應該入唔到嗰池下面，但你可以，血池下面應該收藏咗好多復活蛋......」
我慎重咁盯住血池，接下泉叔交俾我嘅事。
愎慢、細步、輕力咁行入血池，由淺層慢慢行到入深層。似水非水，似血非血嘅池中液體，逐漸由我腳腕、慢慢沾濕到大腿、再到腰間，越係行去池中央，就越係深入。
到最後要以游泳嘅姿態潛入池底，否則只會一直停留喺池面。
「細路，你驚出事嘅話，可以上返嚟。」泉叔提醒我。
一諗到Chloe可能就被兔子人收藏喺池底，我無辦法白白咁退後。
於是我深深吸一口氣，
就低頭往下潛。
池下表面係層層濃郁嘅血霧，但當我潛入深一啲之後，就見到頗為通透嘅池下空間。為求搵到Chloe，我不斷咁游落去並且周圍張望，見到下面種植住唔少彼岸花，更有一顆顆復活蛋被安放喺隔離！
我不顧一切咁游到池底，盡可能一隻手抱一堆蛋，再踢腿上到池面。
「嗄！」一上返去我用力咁吸氣，然後將一隻隻復活蛋交俾泉叔：「泉叔......下面仲有好多復活蛋！」
「得！你繼續拎，但有冇見到兔子人？」泉叔問。
「應該無......」說罷，我將八赤刀放埋喺池外，就繼續潛落水拎蛋。
粗略咁估計，呢個池下面收藏咗大約三十隻復活蛋。
第二次拎蛋過程都好順利，但正到第三次，一直顧住望底下嘅我，無意發現池中央原來浮住另一隻生物......披頭散髮嘅兔子人。
佢好似冬眠咁，喺血池中央位置沉睡住。
真係唔望好過望，突然間極為緊張。
而且呢一次，真係無咁順利，我唔知隻浮喺中間隻兔子人係感受到的咩，佢突然打開咗眼睛，呈現咗紅目。
水池下隨即一陣通紅光芒綻放......
我加快踢腿衝上池面，同時我感受到後面有嘢追緊我......
我唔敢回頭睇，驚一睇就返唔到轉頭。
「嘶～」但我隻腳，喺就快上到去之際，俾嘢捉住咗。
係兔子人！
我用另一隻腳踢佢個頭，希望可脫身，但要喺水中用力，幾乎無任何作用。呢個時候，泉叔喺上面掉咗把八赤刀入池下，沉重嘅八赤刀慢慢下墜，喺沉到我伸手觸及嘅位置後，我握實把刀向腳底方向用力拉斬！