「第一求導者有講過......」導師瞪大眼球，暴走向宋文德：「戴眼鏡嗰個係一定要死！！！！！」
我同沅彤一同緊張咁轉身去後面，發現宋文德不驚不畏，拎起自己手上本好厚嘅《重生會教義》，水平線對準衝緊過去自己距離不到三米嘅教育營導師。
「呯噠」然後將本書推出去導師嘅臉孔上。
俾本好厚嘅書咁樣一打中，導師嘅表情都一下子扭曲埋，宋文德上前起飛踢一嘢踢落導師嘅胸膛！
輕易地被解決。
「我無你哋諗嘅咁弱。」宋文德托返好移位嘅眼鏡。
「走甩咗幾個？」沅彤四周張望。
泉叔望住某個係自己身邊跑走嘅信徒，拎把獵槍對住佢背脊：「如果我打得中，就三個。」
「呯！」打空。
「失敗，太遠。」泉叔盯住佢哋落跑而逃背影，說：「不過仲有一個走唔到。」
禮拜堂內仲有一個因為出入口被我哋堵住咗，而走唔到嘅驚慌信徒。
宋文德慢慢行過去嗰名有如被迫入窮巷嘅信徒，但信徒見走唔到，居然決定攻擊手上無武器嘅宋文德，衝過去拉弓出拳。
宋文德側身避開，伸出一隻腳絆跌嗰名信徒，信徒即刻狼狽咁跌低。
「認住我哋，好好返去。」宋文德蹲低身，拍拍佢膊頭。
信徒見攻擊不果，馬上又轉身向大門方向逃走，即使俾我哋阻攔住。
「俾佢走。」宋文德卻說。
「真係？」我重複問一次，希望無聽錯。
「反正重生會已經知道我哋嘅存在。」宋文德說。
泉叔皺起眉感到不解，沅彤亦有啲不憤呢份仁慈，死死盯住喺身邊掠過跑走嘅重生會信徒。
等信徒走哂之後，宋文德嘴角微笑：「喺佢身上貼咗定位追蹤器，好快知道重生會搬咗去邊。」
原來係咁......
欲擒故縱。
宋文德踩住重生會導師個頭：「況且，我哋仲有依條高級啲嘅雜魚可以拷問。」
依一刻，可以喺重生會導師嘅臉上，讀到一個表情。
完敗。
我哋將重生會導師上綁，押出去禮拜堂外面，諗住帶佢入去宿舍間房拷問，刻意俾佢睇上一個被拷問嘅求導者慘死嘅相貌，
「仲有後山好似未睇？之後個重生會嗰個父長一直守住呢到，唔俾人入去。」我無意想起。
「我都正想去嗰到睇睇。」宋文德說。
「唔...唔得呀！！！」點不知，重生會導師聽完後好大反應。
「唔咩得。」沅彤輕力摑佢一把。
「入面係神使聖地！！！凡俗之人不得......啊！！！」仲未講完，沅彤又向佢下腹毆打一拳。
「無睇錯人。」泉叔輕笑一聲，滿意咁點頭。
「佢咁講得，入面真係有啲嘢。」我望往後山方向。
「唔好！！真係唔好！！！」重生會導師情緒甚為激動。
「趁太陽未落山之前，最好去睇睇。」我建議。
宋文德點頭，認同我講法：「分兩隊，一隊人去拷問，另一隊入去睇睇後山有咩。」
如是者，我哋根據所長分開兩隊人。
有盤問技巧嘅宋文德，就同有拷問技巧嘅沅彤一隊，去逼問重生會導師。
而有獵兔技巧嘅泉叔，就同有八赤刀嘅我一隊，去後山睇下個所謂聖地係咩地方。
我哋兩隊都各拎一部無線電對講機，方便有咩事可以即時聯絡大家。
「依家四點半左右，我哋最遲六點返到嚟。」泉叔對一對錶。
之後，大家就各自出發。