呢個時候，宋文德轉身扭一扭講台上掛住嘅橢圓形紅十字徽章，呢個係重生會嘅標誌！但呢一扭，居然令成座禮拜堂發出機關運作嘅聲音，然後我哋三個所企嘅位置，竟然慢慢下降......
「呢個係......」我愕然。
「多虧我隻眼......」宋文德有些苦澀咁淡淡一笑：「令我臨時發現到「真相」。」
我哋一直降落，而上面空缺嘅空口位，亦由其他石板補上關閉。
下降嘅感覺持續咗好幾十秒後，終於停咗。
納入我哋眼前嘅，係間裝潢豪華嘅房間。
「估唔到重生會仲有咁嘅地方......」我率先踏出去。
「你係點知道個標誌扭到？」沅彤問宋文德。
「你知道暫時安全就得。」宋文德都跟上我腳步。
呢個房間雖然裝修得豪華而莊嚴，但係擺放嘅物品傢俱唔多，中間只有一個小小嘅三溫暖浴池、同上面禮拜堂一樣嘅講台、同掛住幾件黑色求導袍喺隔離，除此之外間房就無咩特別之處。
「私人浴室？咁識嘆。」沅彤行入未注水嘅浴池中。
我同宋文德好自然咁，行去講台前面睇上面放住打開嘅一本書，名字叫做《洗髓儀式》。
「權斷之室，樂園之匙
破蛋重生，換予純潔
不吃喝煙火，不悲樂人間
洗淨記憶，追求悟道
四十四者，成十四者」
「呢到成段，都好似同佢哋口中嘅重生儀式有關。」宋文德推測。
「我哋依嫁點，喺到等？」沅彤坐喺浴池。
「叫泉叔幫手，佢俾咗部對講機你？」我叫沅彤。
沅彤恍惚記起，拎出對講機：「喂...喂...」
「喂？」泉叔把聲，喺密封嘅室內特別響亮。
「泉叔我哋被困啊！」沅彤講重點。
「對面幾多人？」
「七、八到。」
「嗰個宋文德標記嘅位置啱嫁？啱我就即刻趕過嚟喇。」
「啱，但你唔好太衝動，配合我哋先行動。」沅彤回覆。
「得喇得喇。」泉叔咁有信心、歷練嘅聲音，令沅彤放心咗少少。
之後嘅時間，我哋就喺呢間名為「權斷之室」嘅地方等待。
宋文德話過，其實只要喺講台扭一扭「重生會」標誌就可以返上去禮拜堂，但咁做就一定會俾敵人伏擊。
所以，可以做嘅只有等待。
「啱啱嗰個求導者，有強調過自己唔再純潔，因為食咗嘢。」我坐喺宋文德隔離：「而且佢都有講，已經唔記得自己以前任何嘅記憶。」
佢拎住本書，一直深入思考：「我諗，依到的確係重生儀式嘅場所，但係重生儀式，又係咪真係單純一個儀式......」
「你意思係？」
「如果只係基督教咁浸一浸水，就當洗完禮，咁重生會又係唔係咁？因為所有求導者你有眼見，全部都唔係正常人，咁表示個儀式有機會令到一個人產生改變，當然，只係我嘅假設。」
話就話假設，但宋文德可以諗到咁，已經好勁。
無幾耐，可以隱約聽到樓上頻頻發出敲打聲，班信徒應該開始試圖用硬物突破。
「泉叔嚟到未？」沅彤聽到有少少焦急。
「就快就快。」泉叔回應。