宋文德行到主教講檯，上面放住一本書，係類似教義咁嘅嘢，打開嘅一頁係「重生會」嘅歌頌歌──《紅神目詠歌》。
「赤日赤日紅神目......」
「我等願意奉上眼......」
「赤日赤日紅神目......」
「我等願意奉上耳......」
「赤日赤日紅神目......」
「我等願意奉上臟......」
「赤之天、赤之海、赤之山，我等正向你祭拜......」
「請你於逢魔之時紆尊降臨......」
「敬畏的神明啊，原諒我等祖先饕之罪，我願將凡世之羔羊饋贈」
「赤目赤目紅神目......」
「我等願意被召入樂園......」
「赤神赤神紅神目......」
上半段都係我同宋文德稍為聽過下，但估唔到嘅係，原來呢首歌原來仲有下半段。
「四十四名門徒，將會走過重生浴......」
「吾等願意獻上純潔的靈魂......」
「赤日赤日紅神目.......」
「黑暗之兆再降臨，期願樂園之扉再重臨.......」
「願你恩賜吾等享永生......」
「願你再以光耀的姿態，照亮全世界.......」
「呢個係下半段？」宋文德仔細閱讀。
「做咩咁留意首歌？」我周圍搜尋緊其他可疑地方。
「一個宗教嘅歌，係可以代表哂成個宗教嘅精神，如同一個民俗嘅歌，可以代表佢哋一族人。」宋文德一如以往咁講課：「重生會寫得依首歌，無形中係洗人腦之餘，仲有暗裡嘅含意。」
「四十四個門徒、黑暗之兆、永生、獻上靈魂......全部都係關鍵字眼。」宋文德撕走呢一頁，打算拎返去慢慢分析。
「咔噹」倏地，外面發出不明嘅聲音。
我哋三個都同時回頭，望向大門方向。
當中，沅彤特別勇武，佢慢慢咁靠近門前，然後推開少少注視出面嘅情況......
「係無耐前見到嗰個求導者，佢入返嚟教育營......」沅彤將見到嘅，都講出嚟。
「佢做緊咩？」
「咬......咬緊啱啱割落嚟嘅樹皮？」沅彤答。
「食樹皮？痴咗線啊。」我個腦完全係問號。
「捉住佢，就問到想知嘅事。」宋文德又講出最實際嘅行動。
為咗了解呢到究竟發生咩事，我同沅彤就一齊採用咗泉叔最鐘意嘅處事方式──暴力。
我哋兩個趁佢仲咬緊樹皮嗰陣，就偷偷接近佢，到一定距離嗰時就合力將佢壓低喺地！
估唔到嘅係！沅彤制服人嘅能力係咁高，佢跑過去一嘢推人條腰落地，再立即用膝頭壓住佢條後頸嘅位置。
仲喺個口咬緊樹皮嘅求導者，就俾呢下衝擊力整到把口合埋，令佢俾諸多嘅木屑插入牙肉之間，一時間成口都係血。
「嗚啊啊噫！！」求導者發出哀叫。
然後，沅彤好順手咁用泉叔準備俾佢嘅工具──索帶，去將依名求導者嘅手手腳腳都束綁住。
「呼...」沅彤抹一抹汗。
「你班教友去哂邊？」我扯住求導者頭髮，問。
「噫...呃......噫......」佢好似震驚到唔識講嘢咁。