成晚時間，宋文德都自己一個喺二樓，打開張香港地圖出嚟，自己一個計算緊唔知乜嘢。見佢咁專心，我都唔忍心打擾佢，但我諗佢應該推敲緊「重生會」嘅確實位置。
畢竟聽日，我哋要喺無人帶領嘅情況下入去。
落返樓下，就見到泉叔教女咁，教沅彤幫手製作子彈，俾佢把獵槍用。程序就咁睇就似係用倒模整好彈殼，再塞啲火藥成份嘅粉入去。
成個過程又要加工，又要火燒，睇落好繁複。
「泉叔，你有槍、又有子彈，點解唔去打劫？」沅彤用一個好正常嘅語調問。
「呢枝槍改裝嫁渣，及唔上真槍嘅焦耳大，啲子彈都係土製方法，威力唔夠，要好近距離打出去先有傷害。」泉叔一路整，一路笑住講：「仲邊打到劫。」
沅彤聽完之後，冷笑一聲。
到底係咩對話嚟。
夜深人靜，我見人少少，就拎住八赤刀喺屋外練刀。
我好白痴咁打開youtube，睇下人哋係點樣揮出一套連環斬，我先發現原來要配合埋步法同身法先可以行雲流水。
我除咗件萬年襯衫，即係著住件白色背心，就開始起屋外練，一練就練足兩個鐘。一諗到聽日有機會搵到Chloe被藏匿嘅地方，我就禁不住一股熱腔湧上心頭。
如今，
無論發生咩事，都阻擋唔到我嘅意向。
翌日，我哋食咗份簡單嘅早餐就出門口，坐住泉叔嫁車去到宋文德用一晚推敲出嘅大約位置。
車上，我哋無咩點講嘢，可能心情點都有少少凝重，即使今日風和日麗。
「沅彤，我把槍入好子彈未？」泉叔破靜。
「未。」
「幫我入滿哂佢。」
沅彤拎咗泉叔把槍，望一望槍匣：「入面仲有兩粒銀彈。」
「拎出嚟，換銅彈入去，啲銀彈珍貴好多。」泉叔交代。
「你同沅彤都幾好傾。」坐喺副座嘅我，將鼠盤放喺大脾上面。
泉叔輕笑：「係？可能呢個細路女同我一樣口直心快，政，差唔多可以放血。」
聽泉叔咁講，我就拎出一瓶兔子血，慢慢咁倒入鼠盤之中。入面嘅小老鼠波比，亦開始貪婪地飲血，直至全身皮毛悚立。
果然，波比向住嘅方向，同講嘅位置幾乎宋文德相同。
「差唔多可以落車。」宋文德提醒。
臨落車前，泉叔開咗首《Come and get Your Love》緩和一下緊張嘅氣氛。
不得不說，真係有啲用嘅。
「以前我後生嗰陣，拎住部隨身聽獵兔。」泉叔講起往事。
「一槍打爛咗兔人隻門牙啊嘛？好勁，但琴晚已經聽你講咗好多次。」我知沅彤內心一臉厭棄，但無呈現喺臉上。
「拎住。」泉叔將無線電對講機俾咗沅彤。
「點用......」沅彤打量住部嘢。
「亂撳就用到嫁啦。」
到咗宋文德指定嘅地點後，泉叔就停咗嫁車。
重生會嘅教育營經宋文德多次推測，佢估應該係喺一個叫香港地名叫「狐狸叫」嘅地方。嗰到算係郊野公園內比較深入嘅地方，附近都無咩民宅之類。
一路上，小波比都對靈魂嘅反應好狂熱，我交俾沅彤去睇，因為佢隻手比較得閒。
「隻老鼠一直向住西北位置跑......」沅彤望實鼠盤。
「咁應該同估計嘅差唔多。」宋文德拎住張地圖帶路。
一路上其實都好平安，至少無乜危險嘅先兆，但直到行咗大約三份之一左右，我哋見到有一個黑袍人，喺不遠處嘅林路上。
「見唔見到......」我叫停佢兩個。
「嗰個人係求導者。」宋文德都見到，嗰條友大約就喺十米以外。
「佢做緊乜......」沅彤盯住佢嘅一舉一動，並感到困惑。