泉叔就唔洗多講，長期服用兔血嘅下場，就係把口食咩都似垃圾，但佢為咗熱鬧下個場面，令到成個氣氛無咁詭異，都無喺大家面前食生雞蛋。
如果唔係好好咁抖落嚟，或者我一世都唔會知佢哋係有呢一面。
飽餐一頓後，我哋四個都攰到伏喺張檯訓，畢竟大家都飲咗酒。
沅彤喺模糊之間用手機自拍一齊打邊爐嘅相，然後就即攰到訓低。
去到臨近十一、二點，大家先慢慢酒醒，之後落嚟我哋要面對嘅，就係艱難嘅命運。
要再次殺入去「重生會」。
唔同嘅係，我真係會帶埋八赤刀。
喺沅彤同泉叔仲訓到死死下嗰陣，我發現宋文德一早幫我哋收拾好張檯，仲洗埋碗筷，自己出咗去屋外吸煙。
我見自己啱啱訓醒，都諗住出去食下西北風，清醒下自己，順便同想佢傾下計。宋文德聽到開門就回頭望一望，見係我之後就繼續徑自吸煙。
外面真係有啲凍......
「隻眼點？」我雙手插袋，行過去。
「嗯？我隻眼可以點。」宋文德淡淡抿笑。
「你隻眼今朝血都流埋......」我知道，宋文德佢應該有啲嘢隱瞞緊我哋。
「細菌感染。」
「你係見到地獄。」我直接講出，之前佢同特別求導者講嘅事。
呢一口，佢吸得特別耐先回應我：「現實世界本來就係一個地獄，唔係？我哋從出世開始，就背負住死亡呢個詛咒。」
「......」
「政，你抬頭見到嘅依一片天空，係咩景象。」宋文德問。
「成個天都係星，做咩......」
宋文德嘅下一句，有啲震驚到我。
「我見到嘅，只係一片血紅。」
「血紅...？」我試圖參透依句。
宋文德將煙掉落地、踩熄：「自從望見井底紅光嗰日之後，我見到越嚟越多地獄嘅場景，我唔知可以點形容你聽。」
「......」
「但同時，我亦逐漸睇透到「真相」。」
「真相？」
「泉叔，係唔食正常食物吧？」
「......」
「只係食生雞蛋？」宋文德說。
我點頭。
「喺無選擇嘅情況下。」宋文德補充一句，之後望向我：「無論最後事情變到點都好，我哋要保護大家，明？」
「係...」
我唔知點解宋文德要講得咁隱晦，但我相信佢有難言之忍。
到底佢隻眼見到啲咩，
可能係我呢世，都無辦法體會到。
或者人喺尋找真相嘅過程中，會忘記一件事。
就係背負真相，同樣沉重。
凌晨時份，我又見泉叔喺到食藥。
「又食藥啊？」我問。
「無人會想食，但我要靠呢啲藥去抑壓自己。」泉叔食完個邊爐之後，臉色好似好返些少，至少睇落有啲血氣：「可能啱啱食返啲熱熱哋嘅嘢，呢家比起晏就嗰陣已經精神唔少。」
「咁泉叔你聽日繼續休息，我哋會再入多次個教育營。」
「得，我頂得順，我跟埋去。」泉叔說。
「你依家連跑唔跑到都成問題......」
「咁我做後援都得嘅。」泉叔打開廳嘅某盒膠箱，喺入面拎出兩部無線電對講機：「我坐喺車到！隨時接應你哋。」
「你上次都係咁講......」
「死仔......有咗把乜乜刀，就開始睇小我！？」泉叔用力拍我背脊一大下。
講到咁，唯有俾阿泉叔跟埋去做後援。