「即係好似自動導航咁？」我對眼前嘅工具，感到有啲神奇。
「嗯，類似GPS嗰類，直至你發現小波比喺某個街口不停原地轉圈......咁復活蛋就大概喺嗰到。」
「但係搵復活蛋，就代表搵到兔子人？」
「有復活蛋嘅地方，就一定有兔子人，只有靈魂，先可以填充佢哋長年嘅飽感。」泉叔淡淡地說。
「所以...泉叔，你就係咁樣追蹤兔子人？」
「係，朝早揸住車，周圍去睇下小波比對咩方向有反應，如果搵到就喺附近放定陷阱，等夜晚兔子人行動嘅時候伏擊佢哋，呢二、三十幾年嚟，我都係咁做。」泉叔將鼠盤放到床嘅另一邊，說：「如果你想搵嘅範圍大少少，就俾多瓶兔子人血液落鼠盤，但千奇唔好俾多過三瓶，咁樣呢隻小老鼠會頂唔住暴斃。」
「明白，咁泉叔你搞到咁......係因為飲咗兔子人嘅血？」
「一眼睇得出，阿政，你醒咗。」泉叔淡淡一笑，繼續講：「本來其實都抑制得到，喺跟你哋去重生會之前，但去到某近山嘅某個位置嗰陣，我突然聞到山上有一陣強烈嘅靈魂味道，初步估計最少有過百隻復活蛋......」
「......」
「當時我知道再接近落去一定會受唔住控制同誘惑，所以即刻揸住嫁車撞向隔離嘅路邊攔桿，迫自己清醒。」
「唔通重生會附近個山頭上，真係有兔子人同收埋咗好多復活蛋......」呢個係我當下嘅疑惑。
如果係咁，我好有可能喺嗰到搵到Chloe。
「有咁嘅可能，嗰到就係「兔人巢穴」。」泉叔說。
「但點解泉叔，你要飲兔子人嘅血？」正常嚟講，佢靠隻老鼠飲就可以。
「記唔記前嗰幾日嘅夜晚，你去到你父母屋企太過激動之後，我搵哥羅芳整暈你。」泉叔講返起。
「記得......我醒返之後喺你嫁車到......你仲送咗隻兔子人嘅手指俾我，話係你打斷佢。」我嗰晚係最痛心，亦最窩心嘅一次。
但當醒咗，見到泉叔拎住一隻兔子人嘅手指，而且自己滿身傷痕咁送我返去，嗰下......
我好感動。
「當時...」泉叔好猶豫，但都決定講出嚟：「我整暈你之後，就飲咗兔子血，即刻去追蹤當時附近嘅......兔子人。」
「咁如果人類都可以飲血，去追蹤兔子人......」我喃喃咁諗起。
「唔好。」泉叔冷冷咁回我一句：「呢個係我之前一直唔教你嘅原因，千奇一滴都唔好試，會返唔到轉頭。」
「......」泉叔嘅認真，令我不禁三思。
「跟我嚟。」泉叔好辛苦咁行落床，扶住牆咁帶我去到嗰個密封嘅地下室。
我記得，裡面有一隻兔子人。
「要落去？」我問。
「唔好望佢對眼。」泉叔說。
地下室同我上次嚟嘅時候差唔多，一樣諸多嘅行刑折磨工具，仲有被困喺籠中嘅瘦弱兔子人。
泉叔喺地下室，拎出一張舊照片，默默咁凝視。
「呢個係？」我靠近過去睇。
照片中，係個年齡同我差唔多大嘅男仔，而隔離就係年輕少少，仲未生哂鬚嘅泉叔。佢哋兩個搭住膊頭影相，好似老友咁。