往往呢種情況，人都會諗到去最壞嗰方面。
「嗰位泉叔對你嚟講，好重要？」沅彤問起。
我點頭：「我條命，可能都算係佢救。」
「咁佢自己有冇屋企？」
沅彤咁樣講一講，我即刻諗起佢喺西貢南山洞係有間鐵皮屋，我對上一次離開之後，都無返過去。
「我可能知佢喺邊。」我企喺身。
「邊到？」宋文德終於有時間，食返枝煙。
「南山洞，都係西貢嗰邊，不過我自己去就得，嗰到太遠都偏僻，我唔想你哋白行一趟。」
「咁有咩電聯？」沅彤說。
「要買部手機先。」
為咗有聯絡方法，我同沅彤落去簽卡買咗部三部手機，一部歸我，然後佢同宋文德就喺譚國源屋企抖下，都照顧下嗰個半死嘅信徒先。
我就自己搭小巴去南山洞附近。
成個朝早我幾乎都係搭嚟搭去，希望之後唔洗再搭過。
上山段路，我都大概有印象。
但鐵皮屋實際嘅位置，真係要發啲時間搵一搵。
最終花咗一粒半鐘，先搵到間鐵皮屋。
「喀喀──」我敲門。
「泉叔！？」我叫一叫，睇下有冇人。
無人？
正當我咁諗嘅時候，裡面傳出玻璃破裂嘅聲音。
我下意識拎出起八赤刀，推門入去。
我慢慢向住位置最入嘅小房行去，當日我就係喺入面療腳傷。
「咳...」入面有咳嗽聲。
我即刻推門入去，發現泉叔正正喺入面張床上！
不過......
不過周地都係碎裂嘅雞蛋殼、
空溜溜嘅玻璃酒樽、
各式各樣嘅小藥罐，
全部睇落都一塌糊塗。
而泉叔個樣，就半死不活咁訓喺張床上面。
突然間，泉叔又好似著魔咁，神情掙扎而痛苦，然後拎起檯面上嘅一枝針筒，一嘢插入大脾入面。
「泉...泉...叔？」呢一下，我見到都覺得痛。
咁同俾把刀仔插入大脾有咩分別？
我靠近過去，留意到嗰盒針筒嘅盒子上，寫住「鎮定劑」，而床上亦有啲藥物標明住係「肌肉鬆弛劑」。
泉叔經過一番自身搏鬥後，稍為冷靜落嚟：「做咩嚟咗......」
「洗唔洗帶你去醫院？」我問。
泉叔辛苦咁喘口氣，說：「每年依幾個月份都總會係咁......」
雖然我唔知泉叔指嘅係咩，但應該係啲病痛！？
「但你會唔會用太過量啲藥物......」我見地上都唔少藥針空盒，證明泉叔服用過唔少次。
「只有咁樣......」泉叔吞一吞喉，口好乾：「先抑壓得住。」
「咩意思...」我望向嗰啲碎裂咗嘅蛋殼，有啲不祥預感。
「我諗係時候要講你知......」虛弱嘅泉叔，吩咐我一啲事情：「你去我嫁車到，副駕駛位張皮櫈可以拉開，入面有個八方型嘅盒，拎入嚟。」