我慢慢打開眼睛，發現宋文德仲有沅彤，都留咗喺間房入面，無行開過一步。
佢哋嘅眼神，都似乎心意已決。
我唔知係咩原因，推使佢哋陪我走落去。
我只知道，呢一刻手上嘅八赤刀唔再沉重。
因為佢兩個隻手，都一同握住喺刀柄嘅位置，三個人嘅手背手心互相交織。
「佢，係我嘅傳家之寶。」沅彤咁樣同我講。
「我仲要拎佢，嚟搵出真相。」而宋文德，係咁樣同我講。
「多謝你哋。」我吞喉，準備好拔刀。
三、
二、
一。
刀刃出鞘瞬間！
乜嘢事都無發生。
「......」
我哋沉默咗持續數十秒之後，沅彤首先忍唔住偷笑。
連好少會笑嘅宋文德，都忍唔住揚一揚嘴。
至於我就係笑得最大聲，但壓力亦由嗰下笑聲之中，一一釋放返出嚟。
我好自然咁攤咗喺張床到，心跳仲未停止。
我舉起八赤刀嚟睇，刃身嘅反光面果然係呈赤紅色。
事後，我哋推測「紅神目詛咒」只適用於第一個開鞘嘅人，而細佬好不幸地，就成為咗呢一個人。
「既然八赤刀搵到，你哋下一步諗住點？」沅彤問。
某程度上，八赤刀係我哋三個一齊開。
「仲要搵返一個人，泉叔。」我說。
「泉叔？」沅彤唔識係正常。
宋文德諗起，兩日前嘅事：「我哋入重生會之前，佢好似話會跟喺我哋尾？」
「係......但唔知點解，落咗車佢就失蹤咗咁。」我摸摸褲袋，先記得手機已經俾重生會拎咗：「冇手機，打唔到俾佢添。」
「佢應該會返譚國源屋企？嗰到都已經算係你哋半個基地咁。」宋文德推測。
「可以去睇一睇。」
就係咁，我哋搵完八赤刀後，就火速前往譚國源嘅屋企。
一路上把八赤刀由沅彤背住，可能香港人好少可會見到呢種背住武士刀出街嘅女仔，所以個個經過時都會望佢一眼。
搭巴士嗰陣，沅彤好似承受唔住太多異光，決定將把刀交俾我。
「政，拎住。」沅彤將刀交俾我。
「嗯？唔係你家傳寶物嚟咩。」
「你遲早都係繼承者，適應下佢重量。」沅彤咁樣解釋。
咁無計，我唯有變成一個拎住武士刀出街嘅上班族。
講起上嚟，我套襯衫都好耐無換過。
原本以為去到譚國源屋企，就可以見到泉叔，點知嗰到得譚國源一個，仲要係半死不活嘅狀態。
佢奄奄一息咁，攤喺梳化上面。
「水...水......我...要...水......」佢個口乾到破裂。
「成兩日冇人理過佢？」我愣然。
「點解你哋將佢綁手綁腳？」沅彤問。
「佢係重生會信徒。」宋文德拎咗杯水，倒落譚國源個口。
「泉叔有冇返過嚟？」我直接問佢。
「咕...咕......咕......」譚國源飲得好急：「無......佢無...返嚟......餵...我飲食...」
「咁你依家知道你所謂嘅信仰，係幾咁卑微？幾咁不堪一擊？」宋文德收起杯水，說：「無水、無食物，你咩都唔係。」
「......」譚國源目光放空。
「世上無一個教義，係值得你付出性命去追求。」唔知點解，我發自內心想同佢講呢一句：「只有你愛嘅人，先值得。」
「講佢都唔明。」宋文德收走水杯。
泉叔會去咗邊......