去到中段，佢先開始入正題。
「話說上個星期呢，我成家就去咗旅行喇！當時我老豆就帶咗把刀返酒店喎，但係佢又懶係神秘咁，唔俾我哋掂同摸，話把唔可以開封喎，到底把刀有幾神秘！？我哋一於今晚就嚟拆解下......！」
之後，就係佢拎住部攝影機開夜視模式，偷偷入老豆間房拎咗把八赤刀走......
「哇...感覺好重......」細佬說。
我有不祥嘅預感......
唔通...
佢開咗把刀！？
結果，真係如我所料。
去到影片後半段，細佬佢倒數三二一。
就從刀鞘，拉出咗八赤刀......
喺刀刃暴露於空氣下嗰一剎，發出咗極其強大、滿含惡意嘅紅光，釋放照耀住成間屋。
情況持續咗有數十秒，紅色嘅光芒先慢慢停低......
嚇到合埋眼捲縮嘅細佬，先識驚將八赤刀收返入刀鞘內。
「哇，見唔見到咩事......」佢嘅影片，佢到呢到就差唔多結束。
佢即刻受到詛咒影響，但從影片嘅上載日期可以睇得出，喺之後幾日內佢就受到詛咒，演化成一隻復活蛋。
嗰下我恍然大悟，原來......
依個就係佢哋一家，變成復活蛋嘅原因。
受到「紅神目」嘅詛咒。
影片結尾，細佬將把八赤刀放返入父母間房嘅床底下面。
睇完呢一段，我立即衝入外父間房爬低睇，
「八赤刀！」我伸手將佢拎出床底，充滿沉甸甸嘅感覺。
宋文德托一托眼鏡，沅彤即刻跑入嚟。
呢一刻，我哋三個嘅目光都聚焦喺呢把八赤刀上。
「終於...搵到。」沅彤流露出喜極而泣嘅心情。
「咁紅神目嘅詛咒，係咪即係會觸發一次？」呢個時候，我有個更重要嘅問題。
如果唔係，咁我哋之中，將刀開鞘嘅人必定會受到詛咒。
「呢層......我都唔清楚，我諗婆婆要搵我嗰陣，都無諗過要我將把刀開鞘，因為佢同我講過呢一個詛咒，淨係要我搵到八赤刀......」沅彤望向我，說：「然後，搵一個配得上呢把刀嘅人。」
「......」宋文德沉默。
「沅彤，你同兔子人無仇，出去。」之後，我又對宋文德講：「宋文德，你不過係想知道真相，你都出去。」
我要，
將八赤刀拎出鞘。
「你確定？你一開，好有可能會同你女朋友一家人，同一個下場。」沅彤再三問。
「政，有機會返唔到轉頭。」宋文德亦都警告我。
如果每件事，都有一個突破嘅分路口。
我諗，
就係呢一到。
「嗯，心意一早決定咗，二十分鐘之後我就會開刀......」我合上眼睛，諗住喺呢段時間沉澱一下：「你哋有幾遠，就跑幾遠。」
辛苦咁耐，就係為咗可以殺到兔子人，可以搵得返Chloe。
我唔會去到宜到，
就白白放棄一切。
依段靜靜嘅時間，我諗起好多好多。
我嘅人生，我嘅一切，好有可能就要喺開刀之後幾日內，劃上句號。
彷彿所有事情，都變得毫無意義。
到底...
係咪真係所有事情，都會伴隨死亡嘅一刻終結？
我默默咁數緊秒數，大概仲有二十秒，就要出鞘。
如果呢一刻放棄嘅話，咁我呢世都唔會再有勇氣拎出八赤刀。
就算有人幫我拎出嚟，我都冇資格配得上佢。
嗰刻，我先覺悟。
死亡，係會伴隨勇氣而嚟。