估唔到兜兜轉轉，最後都係返到同一個起點。
「周圍搵下，咁大把刀，應該收唔埋喺咩特別地方。」我同佢哋講。
沅彤入我女朋友間房搵、宋文德入外父間房搵，而我就入細佬間房搵。無幾耐，宋文德就已經搵到某樣嘢，不過唔係八赤刀。
佢搵到嘅，係一小疊泛黃嘅粗紙。
「上面有記載住「八赤刀」嘅資料，喺你外父櫃桶搵到。」宋文德拎住份疑似手稿嘅嘢喺到閱讀。
「「八赤刀」，古代神器之一。擁有斬妖滅魔之業火能力。此刀曾與「紅神目」一戰，斬瞎其一眼，但同時亦受到「紅神目詛咒」──「如若此刀再度見光，持刀關係者將會受到詛咒。」如今，八赤刀已被封印於智利復活島上，一具含有鎮壓詛咒能力的復活石像中。」我讀出手稿上嘅內容。
「即係拎住刀嘅人，都會受到詛咒？」我說。
「唔係。」沅彤呢個時候入咗嚟，拎咗份嘢上手睇：「係指將把刀拎出鞘嘅人，同佢身邊嘅人，都會受到當時「紅神目」遺留落嚟嘅詛咒影響......」
「紅神目...」宋文德凝思。
「呢份嘢嘅紙質，好似係你阿婆間屋檯底下個暗格本《異鄉人》日誌嘅質地，我諗......外父當時收到重生會任務，為咗搵八赤刀，都曾經去過鎖羅盆內村調查過，然後搵到呢個線索，就撕咗佢拎返嚟，再當係旅行咁......帶全家去智利旅行，實際上係搵八赤刀......」我開始組織到成件事。
如果係咁，外父真係害死自己全家。
「總之刀喺宜一到，就得。」宋文德繼續搵。
「你阿婆居然帶住咁多秘密，然後留低俾你解。」我對沅彤講。
「我去到嗰陣，已經見到封印「八赤刀」嘅復活石俾人破壞咗。」沅彤雙手插袋，默默細想：「或者，我阿婆就係唔想帶住得自己知嘅秘密離開呢個世界，先叫我去搵返件傳家寶。」
搵咗一陣，我入又返細佬間房，諗住成個禮拜無睇過新聞，睇下呢個世界依家發生緊咩事都好，同社會脫節咗一段時間嘅人生，真係好無安全感。
「
《狂牛日報》
熱門新聞：
１：賓穎偷食被斷正！星途盡毀，幸得女傭機構接納聘請
２：歌手立博賢宣佈，明年將與拍檔王佑菁在日本新宿舉辦十四場音樂會
３：天文台預計本年度，將出現百年一遇日蝕現象，時間將在六月二十一日發生，估計香港暗黑時份將會破天荒，持續二十四小時！
４：警方宣佈，昨日合共四名警員於公廁內吞槍自殺，調查後認為案件無可疑
」
無見一排，估唔到香港啲新聞都係一鬼樣。
突然，電腦桌面收到Youtube訊息通知，有唔知咩咩人喺你嘅影片上留言，我好奇撳入去一睇，發現係細佬出事前，放上頻道嘅生活影片。
以前我同Chloe都覺得好無聊、好幼稚，依家睇返......
算係佢唯一存在過嘅證明。
但當我撳入去條影片，睇到個標題嗰下，真係無一個字可以形容到我當下嘅表情......
「開箱片！偷咗老豆喺智利島帶返嚟嘅神秘日本刀！？把刀到底有幾型！？」
我呆完之後，立即打開條片嚟睇。
影片一開頭都係啲自我介紹，毫無緊要。