當我哋見到人造馬路嘅時候，時間已經係清晨。
望下馬路嘅路牌，上面寫住「北潭涌」三字。
「我哋一直向西南面行，計返地理位置嚟講......」宋文德合埋雙眼，又進入思考模式：「重生會嘅教育營，應該係喺西頁東郊野公園嘅深山之間。」
我同沅彤聽完之後都唔知點解宋文德咁勁，成個Google map喺個腦入面，但佢講得嘅應該都係啱。
「成個西貢都好多呢啲渡假教育營，我以前參加唔少......」沅彤說。
「行前少少？我諗呢到路中間，唔會有車停。」我提議。
再行前少少，就到北潭涌嘅渡假營，嗰到有成個停車場，但冇一部我哋係用到，因為啲車唔係我哋。
「屌...」沅彤隨便咁踢人哋嫁私家車一下：「冇部用得。」
「趁宜家休息下？跑咁耐山都攰。」我坐喺地下。
「正有此意。」宋文德都坐低。
感覺上，同上一次喺鎖羅盆內村跑落山之後嘅情況差唔多。
唔同嘅係，今次多咗沅彤。
算係...
半個新拍檔。
三個人坐喺路邊，等待住城市一日嘅開始。
「係咪日出？」我望向東邊。
「終於朝早...」一到日頭，宋文德先正真放低戒心。
「呵欠......」沅彤暈亦昏昏欲睡。
最後，佢兩個嘅頭不自覺搭住喺我兩邊膊頭上，疲倦到訓著咗。
到底，
呢條路嘅最後，
我哋仲可以見證幾多個日出？
七時四十分。
「嗖──」一嫁房車高速掠過，嘈醒咗自然訓著嘅我。
我模糊咁打開眼皮，見個天都開始光猛，應該可以搭車返市區了。
於是喺某嫁的士經過嗰陣，我舉一舉手叫停的士，再叫佢兩個起身。
「沅彤。」
「嗯...？」佢慢慢打開眼睛。
「上車。」我轉頭，叫醒埋另一條友：「宋文德。」
「宋文德？」我再叫一次。
佢似乎真係攰，叫咗幾聲佢都唔醒。
於是我將佢扶到的士入面，再叫司機開車去Chloe嘅屋企。
搵泉叔要緊，八赤刀更要緊。
「你哋喺路邊等咗成日車啊？」司機大哥搵下嘢講。
「係，我哋喺條街露營，係咪好型。」沅彤吸咗大麻？
「哈哈哈。」司機大哥當佢講笑，繼續問：「你朋友做咩事？」
「咩？」
「佢隻眼流緊血喎......」司機望住倒後鏡。
我視線慢慢移去宋文德身上，佢閉上嘅眼皮真係流出緊一行血淚......
「宋...宋文德！」我搖一搖佢。
沅彤見到呢個情況都好錯愕。
數次嘅狂搖下，宋文德總算打開咗眼睛，隻眼唔知發炎定點，又係好紅。
「你點啊？有冇咩唔舒服？」我問。
「做咩...」宋文德不解咁望住我哋。
「你隻眼...流緊血......」
宋文德伸手摸一摸眼底，指尖果然沾摸到濕潤嘅血跡。
「......」呢種不明嘅情況，佢都無言無語。
但我知道，某程度上係關佢見過井底嘅事。
「要紙巾？」司機遞一張去後面。
宋文德接過紙巾，抹一抹眼下嘅血水：「我...休息多陣就可以。」
話畢，佢轉頭面向窗外嗰邊合眼休息。
佢講就咁講，話無事。
不過我同沅彤嘅表情之間都互相透露出，覺得宋文德隻眼應該出咗啲咩事。
司機駛到翠林村後，我哋三個一齊上樓，準備入去Chloe間屋搵出八赤刀。期間，我一直留意宋文德情況，驚佢突然腳虛、頭暈之類。
「咔」我用後備門匙，打開道門。
「政，呢到就係你女朋友屋企？」沅彤半帶好奇，半帶期待。
「係。」
又返到呢個，回憶之地。