我確認過佢鼻息之後，慢慢放低佢落地，順便拎走佢頸上嘅鎖匙。
點不知，開門之前沅彤俾嗰塊染血嘅石頭我。
佢呢個眼神，銳利帶柔。
我知佢想點，於是我接過佢塊石頭，俾條鎖匙佢，然後一嘢打落嗰名重生會成員嘅頭上，即使係死係活。
或者咁樣，我哋罪惡感可能就相同，就分輕。
即使對方係誤入歧途嘅惡人，每次奪取對你並無惡意嘅生命，都總會惻隱吧。就似要被執行死刑嘅犯人，就算惡貫滿盈，面臨死亡時大家都係和平。
我連續打咗幾十下，沅彤先用鎖匙開門。
「咔」
入面放滿各式各樣嘅物品，我同沅彤搵起嚟都要啲時間，點不知佢好快就搵到。
「終於搵返......」
我回頭一望，原來只不過係佢條紅髮繩：「髮繩......？」
「係...」佢咬住紅髮繩用，然後紮返好條馬尾。
雖然係無以前咁長，但都一樣秀麗。
「我以為你唔見咗嘅係長頭髮......」
「呢條髮繩緊要過我頭髮好多。」
「有咩用。」
「感應到兔子人喺唔喺附近。」
我愣住：「點...感應？」
「當附近有兔子人，條髮繩就會自動收緊，嚟代表附近有危險。」
「咁有用？」我真係有眼無珠。
「又係我婆婆臨走前，送俾我嘅遺物。」
「你阿婆真係好想你繼承佢咁。」
「係？同怪物打交道唔啱我，我仲有上好嘅人生要過。」估唔到沅彤咁直接。
「既然唔啱，借把刀俾我？」
「你都要有資格拎起佢先得。」沅彤淺笑。
無幾耐，我終於喺個小貨架上搵返「八方鏡」，好彩嘅係塊鏡無裂無爛。
「應該行得？」我說。
「嗯。」沅彤點頭，說：「仲有條屍。」
我拖住重生會成員嘅條屍體，去到禮堂下嘅空心格：「搵地方收埋佢......」
一般嗰啲暗位，係用嚟收檯檯櫈櫈，但用嚟收屍都應該可以。
「呼......」收好之後，我哋就快快手手步出禮堂。
我哋事前同宋文德約好咗，十五分鐘以內就要喺教育營入口集口，如果對方嚟唔到，就代表出咗啲意外，可以自己一個走先。
距離集合時間應該仲有兩分鐘......
唔知點解仲未見到宋文德身影嘅我，有啲焦急如焚。
「差唔多......」沅彤左望右望。
‧ ‧ ‧
‧ ‧
‧
一陣過後。
「應該夠鐘，我諗點都超過咗十五分鐘。」沅彤已經半隻腳踏出教育營。
「等多佢一分鐘。」我說。
「政......」
「三十秒。」我盯住教育營入面。
宋文德...
「真係要走。」
「俾多十秒。」我講。
最後一秒，有個身影喺遠處由行路，漸漸變跑咁過嚟入口依邊。
我哋唔確認嗰個係咪宋文德，所以都好緊張......
但我相信...
係佢。
「對唔住，遲咗兩分鐘四秒。」納入眼內，真係係佢嘅臉孔：「成功？」
「成功。」見住自己朋友無事，令我莫名地有少少感動。
「咁走。」宋文德一貫做領頭角色。
我哋三個，總算離開咗呢到。
不過，
我哋仲會返嚟。
帶埋八赤刀。
我哋用咗成晚去逃離呢座深山野郊，又用到宋文德錶上嘅指南針去辨識位置，務求可以盡快返到市區。