「你幻想到，佢哋死之前嘅微笑......？」
主教講完之後，我諗到Chloe變成復活蛋嗰一刻，到底諗緊咩、佢係咩心情、佢係咪好孤獨......
越喺細諗，兩隻眼就越係忍唔住地，流出咗兩條淺淺嘅淚痕。
「神保護唔到所有人，所以先製造出我哋所愛嘅人。」我可以聽到，老人慈祥嘅聲音，已經近在咫尺：「等我哋可以去保護彼此。」
「......」
「之後路上無論你有咩困難，都總會捱過。」一雙飽經風霜嘅手，輕輕抱住我：「只要你願意信任我，我係唔會放棄每一個門徒。」
「你可以點做......」沉默好耐嘅我，決定講句嘢。
「我會繼續行苦道，直至你哋得到歸屬。」
「我想知道，你係咩樣，你係一個點嘅人。」
「咁我哋就約定喺某個絢爛而燦爛嘅黃昏下，企喺無苦痛嘅「樂園」大門相見。」
佢又問：「政，你今年幾歲？」
「二十八...」
期間，我扮伸懶腰，意圖擦開少少塊眼罩，擠出一啲空間望到出面，雖然只係望到地板，哪怕係一秒都好，我好需要空間感。
估唔到，我居然隱約見到有一陣紅光微微咁喺前方綻放住......
數小時後，主教就叫我去休息，我亦終於可以行出禮拜堂，除低個眼罩。
但我仲好諗緊......
禮拜堂嗰啲紅光，係咩一回事。
嗰隻獨有嘅赤紅光芒，係好難偽裝得到。
絕對係屬於兔子人嘅「紅目」，我自己都曾經直視過。
但點解會喺正我前面？
當然，有個兔子人企喺正我面前呢個猜想，我有諗過下，不過佢又無襲擊我。
其次，我仲猜想過主教可能就係兔子人，如果唔係點解要信徒蒙眼入去？但呢個講法又好難成立，畢竟主教輕輕抱過我，我感受到佢有作為人類嘅雙手同身形。
我準備將以上種種發現同猜想，一一講俾宋文德同沅彤知。
估唔到，我一入房佢哋反而好似有更緊急嘅事同我講。
「政，我哋諗好點樣拎返塊八方鏡。」宋文德對我講。
「我有更重要嘅嘢，要同你哋講。」我說。
之後，我將禮拜堂嘅事，都一一講俾佢哋聽。
「係好可疑，每個入去嘅人都要蒙眼唔見得光......」宋文德語氣深狠，說：「肯定有不可告人嘅真相。」
「話唔定，佢身邊有兔子人？我意思係間禮拜堂入面，間嘢雖然細，但我覺得要企幾十個人......或者兔人，都唔係問題。」沅彤推測。
「不過呢家講咁多都無用......」呢一刻，我都莫名想知道當時眼前嘅，到底係啲乜。
「無八赤刀，就算見到兔子人，我哋咩都做唔到。」我續說。
「原本我同沅彤諗住依幾日內，夾計拎到供品庫鎖匙，偷返塊鏡出嚟。」宋文德停一停頓，繼續講：「我諗，要加快進度，今晚就偷出嚟。」
「然後離開呢到，再返去Chloe屋企搵八赤刀。」我講埋落去。
「再返去教育營宜到，睇下禮拜堂入面係咩嚟？」沅彤最後補充。
計劃，大概見到個初形。
「宋文德，咁我哋按照啱啱傾嘅，夜啲去拎鎖匙？」似乎沅彤同宋文德趁我唔喺到嗰陣，傾咗好多嘢。
「計劃係點？」我完全唔知。