第047章

第047章

沅彤聽完後,亦只係簡單問一句:「信得過?」

「我哋仲好似知道咗,八赤刀可能就喺我女朋友屋企。」我說。

「咁仲唔......」

「佢好似仲有啲嘢想知道......」我信得過宋文德,而且要走一齊走:「同埋佢覺得事情唔係咁簡單。」

「唔係咁簡單嘅意思係?」

我有啲難以啟齒,但都決定講出嚟:「佢隻眼曾經見過第二個世界,可能佢見到一啲,我見唔到嘅威脅......」

「第二個世界...有趣。」沅彤用無趣表情,講出依一句。

個所謂重生會主教,每見一個信徒就要用成至少三粒鐘,所以我同沅彤喺營內等咗半日,都未輪到我哋俾人召見。

長軴呢到嘅信徒,生活都幾樸素,劈下柴、唸下歌、跪下拜就可以消磨足成日。至於沅彤,就比較特別,佢喺外面草叢摘咗木枝,就喺間房當刀咁揮。

開門入房見到嗰陣,我差啲以為佢終於都痴咗線,點不知佢話原來自己細細個,就俾婆婆迫住要學劍道,所以見無聊就喺到練習下。

「搵返八赤刀之後,你會點?」我坐喺張床上,望住佢認真揮枝。

「根據我婆婆遺言所講,之後要去搵一個可以消滅「紅神目」嘅人類。」沅彤停止揮擊,銳利嘅目光仍停留喺木枝上:「嗰個人或者就係我?或者,就係你。」

雖然沅彤有日本女仔嗰份清秀氣質,但表情好多時都係目無表情,又或係面對討厭嘅事情時,眉目間就流露出少少不屑嘅倔強。

「你阿婆好似有心裝備你咁。」我說。

「我都想軟弱。」沅彤目光聚焦一點,繼續假想敵人向前揮枝:「無奈世界要我披上盔甲示人。」

聽完依句之後,我默默行出房間。

返到房嘅時候,手上都拎住條木枝:「可唔可以......」

「擺好架式。」

沅彤直接對我講。

就係咁,我好歹都叫跟咗人學半日劍。

理所當然,沅彤嘅實力比我高出好多,佢可以完美招架我每一下揮擊,又可以完美擊中我每一處部位。

「最緊要係集中。」佢提醒我。

「係...」

對劍期間,我向沅彤問咗個問題:

「你啱啱講嘅「紅神目」其實係咩嚟?重生會有句歌詞都好似有呢隻字,即係兔子人?」

「「紅神目」,即係吞下八赤勾玉嘅生物。總之凡係吞咗殘存喺體內嘅,無論係人定係動物,都可以統稱為紅神目。」沅彤就算講緊嘢,動作都依然流暢。

「你婆婆真係無講,成條村發出紅光之後發生嘅事?」

沅彤搖頭:「之後嘅事?之後佢落山嫁咗俾個香港人,即係我阿爺,然後做古董生意,再生咗我阿媽,阿媽又生咗我,最後我喺到教你用刀。」

時間好快到傍晚,我又不經意諗緊泉叔到底去咗邊。

「集中。」

「係!」

「喀喀──」房間傳嚟敲門聲,我哋嘅對劍亦短暫停止。

「下一位新信徒,到你接見主教。」一把陌生嘅聲音,但相信都係重生會信徒。

沅彤放低木枝,抹抹臉上嘅汗就行出去。鑑於自己一個喺房有少少恐怖,我又行出走廊抖抖氣,咁啱聽隔離房發出奇怪嘅聲音,出於好奇過去望望。

正在加載第048章
文字
背景
默認
白色
米色
灰色
淺綠
綠色
深藍
黑色
共0章
  1. Loading...