「結果係，唔知係咪嗰隻兔嘅影響，令到成座山嘅兔繁殖得好厲害，大家不斷捕食都仲有，所以村民更加崇拜呢隻所謂嘅「因幡之白兔」，各家各戶都開始拜祭佢......」
「難怪我去到嗰陣，每一戶都見到有兔嘅銅像。」我說。
「最終，婆婆只可以搵村外兩位出色嘅獵戶幫手，追尋兔嘅下落。其中一個獵人成功打斷咗隻兔嘅左腳，另一個獵戶就透過追蹤佢嘅血跡，成功捕捉到佢......但佢無交出俾我婆婆用八赤刀處決佢，反而係成家一齊食咗佢。」
「我有啲不祥預感。」
「嗯，婆婆話嗰晚之後，成條村發出咗一陣極強嘅紅光，幾乎所有村民就消失哂，應該係話變成蛋......」沅彤停低咗。
「之後？」
「婆婆嗰陣發生嘅事情太恐怖，自己都唔記得咗，到老咗寧願忘記。」
聽完成個故事，我都或多或少開始砌到少少前因後果。
「你呢？你未同我講，你要救嘅人係邊個。」講咗好多嘅沅彤，轉問返我。
「我要救嘅，係我女朋友。」
「佢俾「重生會」洗咗腦？」
「係佢一家變咗隻蛋，我至少要搵返隻蛋，喺一路嘅調查下，命運不知不覺咁，帶咗我嚟依到。」
「希望你搵得返女朋友。」
「希望你搵得返把刀。」
互相祝福之後，我哋就不經不覺咁訓著。
講出心底嘅說話之後，訓都訓得舒服啲。
【宋文德視覺】
山區，教育營。
凌晨三時。
每個人，都有佢嘅信仰。
有人信奉金錢至上、有人信奉無限權力、有人信奉真愛不死、有人信奉工作之道。
而我，一生都追求信奉緊一件事物......
真相。
為咗真相，我可以做出超越自己界限嘅事情。
信仰無處不在，深深咁植入每個人體內。
打從出世開始，我哋就避無可避。
唯有掌握佢，
先可以獲得僅有嘅安全感。
喺通往供品庫嘅昏暗長廊上，我諗起過往種種嘅事情。
包括「絕望橋」事件。
到底人喺成功追求得道時，係唔係會得到真正嘅解脫？
「你好求導者。」某個項上掛住一條鎖匙嘅男子，擋喺供品庫嘅大門前。
我原本仲想趁夜深，去供品庫幫阿政拎返八方鏡，睇嚟暫時係無機會。
「你好。」但都照舊，禮貌性回應一下佢。
「求導路上，辛苦嗎？」佢哋偽善嘅笑容，喺我眼中特別扭曲。
「唔及你辛苦，看守緊供品？」每一句對答，都係一次套料嘅機會。
「無錯。」佢點一點頭，答：「上次求導儀式，進行得順利嗎？」
「順利。」
錄影機拍到內村嘅嗰一日？
「真係希望，「樂園」留有我一席之位。」
「你應該清楚，咩資格嘅人先可以前去「樂園」。」繼續一貫嘅套料技巧。
「當然清楚，只有接受「重生儀式」者。」佢臉上，忽然流露出美滿嘅表情：「我已完成好奉獻，準備接受下一次重生儀式。」
「準備？」
「嗯，我喺一間中型企業擔當會計師，已經聽從好教會俾出嘅指示，虧空公款，將大筆資金轉移到「重生會」入面，只要可以通往「樂園」，喺凡塵擁有幾多錢都及唔上。」
「你階級，應該唔單純係「信徒」吧。」從佢可以掌管供品庫鎖匙就知道。
「教主俾我管轄「重生會」嘅財政，係我嘅榮幸。」
見佢無任何會離開意欲，我只可以再等下一次機會，
但更重要嘅係，要首先拎到佢把鎖匙。
其實除咗供品庫入面收藏啲咩，係令人好奇之外，教育營仲有另一個令人在意嘅地方，就係通向後山嘅入口。
喺嗰到重生會特意綁咗一條鐵鏈，示意外人唔好亂入去。更加有個戴住兔子紙面具嘅男人，企喺入口處看守，佢個名好似叫「父長」。
離開供品庫嘅樓層後，我打算再去多次宿舍搵一搵阿政。
結果，俾我發現心寒嘅一幕......
我喺宿舍長廊，見到最盡頭阿政間房，有個女人企喺門外默默咁望住房間入面，即使走廊燈火全滅，我都可以依稀咁見得到。
真相，又再次觸發我嘅勇氣。
我特意行近嗰到，先睇清楚嗰個女人係母長。
佢將對門開咗細細條門縫，唔知望入面做乜。
「母長？」我出聲，佢先發現我嘅存在。
「噫...求導者好。」被我發現嘅母長，對我躬身。
「入面有嘢？」我問。
「求導者，我偷聽到佢哋喺房間嘅對話內容。」母長說。
「嗯？」
「然後我發現......佢哋唔係真心信奉「重生教」嘅信徒。」母長瞳孔瞪大，神情猙獰。
「......」我沉默。
到底阿政，同嗰個女仔講咗咩嘢。
「我要回報俾教主聽......聽朝一早！」母長神色完全係迫不及待。
咁會，破壞計劃。
阻止我接近「重生會」嘅真相。
又要執手尾。