經歷成日挑戰，開始勁攰嘅我，求其揀咗一間最左面嘅房入去，入面有三張雙層床，除此之外就咩都無，簡陋到無嘢好講。
而嗰個女仔，亦都好似有心跟住我尾，入咗同我一間房。
我入到去，第一時間訓喺其中一張床上放鬆成個人。
而佢，就坐喺另一張床上，主動問我事情：「點解八方鏡，會喺你手上？」
佢好了當，直接問咗個我都想知，佢點解會知嘅問題。
「你知道八方鏡......？」我說。
「因為......」佢欲言又止。
「你唔信我？」我望向佢。
「嗯...」
咁都係，大家一樣入咗嚟邪教。
太易信對方唔係一件好事，大家就了解下先。
「可以點叫你？」我坐返好，問。
「沅彤。」
嗯，一個普通嘅女仔名。
「你？」佢問返我。
「政，阿政。」
沅彤佢點頭：「你嚟宜到嘅目的係為咗咩？」
「為咗一個人。」我專登答得空泛。
「咁你？」我又反問。
「一樣物件。」
「物件...？」
「嗯。」佢都好似特登唔講詳情。
互相保持警戒，好事嚟。
「宜到可以搵嘅人應該唔多。」沅彤盯住我眼睛。
「佢係我......」
「喀喀──！」
倏地，門外傳嚟一陣敲門聲。
「你兩個喺到傾緊咩啊？」係母長把聲......
我同沅彤都下意識收咗聲。
「想提提你哋，呢到無熱水，同埋一陣七點可以去飯堂進食。」母長講完之後就離開。
雖然見唔到個人，淨係聽到佢把聲，不過都令人異常不安。佢由本今日朝氣十足嘅中年女士，漸漸變得詭異。
之後，我同沅彤就無傾啱先個話題......
畢竟，隔牆有耳。
所以，我哋轉咗話題。
「你幾多歲？」我問。
「二十四。」
「同我估嘅一樣。」
「咁你？」
「二十八。」
我哋好似有共識咁決定，暫時將自己入嚟依到嘅秘密收藏，但可以確定嘅係，我哋都有各自目的。
「抖陣先，你應該都攰？」我背脊再次訓落床到。
「嗯。」佢打側身訓低，眼甘甘咁望住空氣。
喺床上休息咗陣，去到約莫七點，訓得正冧嘅我被某人輕拍膊頭。一打開眼睛，見到係沅彤，因為到咗食飯時間，而順便叫醒埋我。
失去咗馬尾嘅佢，反而特顯咗嗰種酷酷嘅冷感。
我打個呵欠，就同佢一齊行出房間。
喺長廊上其他人都開始從房間行出，估計佢哋都係通關嘅「信徒」。不過佢哋好似夜晚唔驚鬼咁，全部人自己一間房。
「請各位跟隨我嘅步伐，移步到飯堂。」母長入嚟宿舍，同各位講。
我數一數跟住母長嘅信徒，連埋我同沅彤總共有七個人，五男兩女，年齡都係二十至四十不等。
「入到去可以拎張櫈坐低先。」母長開門俾我哋：「聽朝你哋就要受課。」
受課？即係上堂......
所謂嘅飯堂其實就係間空置咗嘅小小活動室，但由於入面無冷氣機，所以有少少悶焗，加上唔知係咪無用太耐，一去拎摺櫈就塵埃四起。
我哋七個人坐喺摺櫈上，母長就用仁慈嘅笑眼橫視住大家，但臉上過度表現嘅仁慈，就會變得詭異。
「食飯...食空氣啊？」沅彤低聲咁同我講。
睇嚟佢都有講笑嘅一面。
「佢唔好再俾啲生雞蛋我食就夠......」我說。
「熱飯就快提供，我想大家學識感恩。」母長突然做出跪拜姿勢，說：「各位！將要得到溫飽之前，一齊歌頌紅神目！！」
我可以發現沅彤暗暗用口形講咗句「屌你老尾」，然後跟大家一樣做出嗰個令人腳酸嘅跪拜姿勢，當然我都唔例外......
「赤日赤日紅神目......」呢次歌頌，一唱就唱足三十分鐘。
直到外面嚟咗一批人，母長先至停止領唱。
「各位可以坐返低。」母長說。