呢個求導者發現我望見佢之後，並無作出任何舉動，依然好似看守者咁監視住我。
我正常係應該要開口問佢係咩人，點解會喺到之類，但我所有嘅說話都好似俾某樣嘢抑制住一樣，講唔到出嚟。
我哋就係咁對望咗持續三、四秒，雨水都已經令全身濕透。
直至我慢慢退後，想經入寺廟再返去宋文德嗰邊通知佢外面有人時，我發現佢跟蹤住我，但保持住一定嘅距離。
我行到寺廟後門，佢就會行到寺廟門口望住我，呢種俾人望住嘅感覺，實在唔好受。
「你做咩跟過嚟啊！」我忍唔住威嚇佢。
但佢無俾到任何回覆我。
我拎出泉叔把狩獵小刀，繼續指住佢講：「我知你係「重生教」嘅人！」
無回應。
一諗到佢哋對嗰位拍攝者所做嘅事，我就覺此地不宜久留，隨時會有生命危險......
要我殺落刀殺兔人，我毫不猶豫。
但要我落刀殺人類，我會猶豫，至少依一刻......
我無拎住把刀衝去劈佢嘅勇氣。
「宋文德！出面有個重生教嘅人......」我決定衝入屋，叫醒咗宋文德再算。
「重...生...教...？」宋文德俾我拍醒，模糊咁戴番眼鏡起身。
「就喺屋外面！望住我哋！我唔知佢望咗幾耐，但係我覺得好危險。」我說。
「咁對方應該係喺入黑，我哋入咗依間屋休息之後，先嚟到內村呢到。」宋文德一醒，即刻作出理性分析：「如果唔係我哋入村嗰陣無可能發現唔到。」
「咁點搞宜家？殺...殺咗佢？」我唔知個身係俾雨水淋得凍到顫，定係心理作用而顫：「定係即刻跑落山......」
「佢有冇攻擊嘅意圖？」宋文德問。
「無...暫時無，啱啱只係默默咁望住我。」
「一個人？」
「我就咁睇，係一個人。」
「咁就得。」宋文德托一托眼鏡，目光沉穩：「可以試下同佢溝通。」
「無用嫁，我啱啱都試過問佢嘢......佢一句都唔講，一句都唔應。」
「咁可能係你無用到可以同佢溝通嘅「頻道」。」宋文德企喺身，整一整理西裝：「通常邪教成員都會進行自我隔離，係典型嘅分離主義者，只會同成員交流，呢啲係規條之一，亦係佢哋嘅信仰。」
又講一堆，我唔明但好似好勁嘅說話。
「我準備出去同佢搭上同一條「頻道」，你呢？」宋文德行到門口前，準備開門。
「我有刀，我跟喺你背後。」我說。
宜一刻呢到就好似間安全小屋，幫我哋兩個避開外面嘅劫難，如果可以嘅話我真係唔想出去，但我知咁做都只係自欺欺人。
有啲事情，
有啲真相，
人係終須面對。
開門行出去，果然就見到企喺不遠處嘅黑袍求導者。
「就係佢？」宋文德望過去。
我點頭：「嗯...」
啱啱宋文德所講，搭上同一條「頻道」 就溝通到，令我無意間諗起譚國源，即係泉叔綁架嗰個重生會信徒。
佢一開始都好似係十問九唔應，但自從我冒認自己身份係Chloe細佬，佢就開始肯講嘢。
我恍然，原來宋文德講嘅所謂搭上「頻道」就係咁解，腦筋真係轉得唔夠快，睇嚟我壓力真係幾大。
「你好。」宋文德慢慢行過去，任由雨水落到身上。
一如所料，重生會求導者無作回應。
「赤日赤日紅神目.......」宋文德學影片中，重生會嘅領唱者咁，用同一歌調唱出依句。
良久，求導者發出渾濁嘅喉嚨壓音，然後作出咗回應：「我等...願意奉上一切......」
成功？
「你闖入淨土......「樂園」...尚未通向。」
「樂園？」好明顯，宋文德係唔太清楚喺邊。
「你唔清楚...樂園...？」對方繼續陰沉、渾厚嘅聲線。
「樂園就係，所有求導者最終到達之地吧。」宋文德好聰明地，回避咗呢條問題。