而係後半頁嘅紙都俾人撕開咗，至少有數十頁以上，被刻意撕開咗......
或者係俾白蟻蛀食？我唔清楚，但我諗之後嘅結局，都應該無緣再睇到。
《異鄉人》嘅作者名，係叫「赤井一華」，用毛筆嘅字體係同屋主蘇青瑜幾乎一樣，所以我估計宜個係佢嘅日本名，蘇青瑜就係佢嘅中文名。
如果好似宋文德咁講，呢條村係拜祭日本神明「因幡之白兔」，咁就大概叫做有個解釋，解釋到呢樣文化差異係邊個帶入嚟。
果然，用腦過度係比較易訓著，我諗諗下就入咗夢鄉。
半夜唔知係咪我幻聽......
我好似聽到...
屋外，有把聲。
我埋開眼，打算凝神聆聽，再確認一次。
‧ ‧ ‧
‧ ‧
‧
應該無聽錯，有把疑似唔屬於自然界嘅聲音，
喺外面傳嚟......
外面有風聲、海潮聲、雨聲、樹搖聲、雷聲，更混雜住一把不明嘅人聲。
係咪真係人聲？我都唔太知，總言之係喺喉嚨發出嘅聲音......
我又望下手機，經已凌晨三時半，我大可以繼續合埋眼訓覺扮無事。
但咁又同呃自己，有咩分別......
我內心話俾我知：只要我一日唔面對畏懼，一日都唔會有勇氣面對兔子人。
所以，我向門前跨出一步，準備打開門。
準備推開門嗰下，門外響起「呯──呯──呯──」嘅聲音！
我嚇到向後仆咗一仆，回神過嚟先意識到係風勢太大，撞上失修不穩嘅木門時通常會發出嘅聲音。
原本諗住叫埋宋文德，但我總有一日，會得返自己一個。
「咯──」我慢慢將門推開。
出到去第一件事係打開手機嘅電筒，否則黑到連路都睇唔到。
嗰把聲喺水井下傳出，聲音好深入。
似女人嘅哀叫，但又似人非人，似鬼非鬼，可以確定嘅係，把聲好哀怨......
就似某種求救，佢嘅聲音充滿住悲傷、美麗、困擾，並唔係單純會嚇怕人嘅恐怖，更似係有特殊嘅魔力，誘導你耳朵同腦袋去了解來源嘅聲音。
我用咗接近五分鐘，行去正常只需要十五就秒就行到過去嘅水井前。
將個身傾前去俯視嗰井前，我深一深呼吸。
因為我都唔知......
一伸個頭埋去，會見到啲咩。
但應該都無嘢可怕得過，喺眼前白白失去咗女朋友！
我握緊拳頭，將身體傾向前瞪大眼睛望向水井下。
一片...
漆黑？
我凝固住井下五、六秒，都無任何物事同動靜。
但更奇怪嘅係......
我一望落去，剛才一直喺井中傳出嘅聲音，
就停止咗。
「係幻覺...？」
正當我鬆一口氣，想縮返個頭埋去時，冷不防瞄到井下......
一雙鮮紅嘅目光閃現咗半秒。
「...」
我成個人乃至全身，都俾呢半秒害到近乎僵硬。
為咗確認自己無眼花，我再次凝視深不見底嘅水井。此時，狂風呼呼作響，我凝神貫注眼前嘅畫面，無端諗起尼采一句說話。
『當你凝視深淵時，深淵也凝視著你。』
今次我持續咗十秒以上，視線完全無離開過井口，下面都係一片漆黑，唔通真係我多心？
就喺我打算轉身返去之際，一道閃電轟烈地劃過冷冷雨夜，令現場嘅能見度一下子提高。
同時...
亦令我留意到，
喺我五米距離嘅位置，企住某個嘅人。
佢面目陰沉，眼窩深陷，著住求導袍默默咁企喺隔離瞪住我。
如果唔係嗰天突然打咗道雷光，我都唔會發現佢嘅存在。
從佢袍上嘅掛飾望出，佢係「重生教」嘅人，因為佢頸上正正戴住重生教嗰個蛋形加個十字架嘅吊咀。