第010章

第010章

我有印象,嗰日嘅晚霞係紅滿天,就好似層層淡薄嘅血霧籠罩住成個天空。
一年之中,總有幾日嘅傍晚係會有宜種景象,所以我無特別為意......
仲覺得嗰天幾靚,但宜家我從影片中望住細佬間房當日窗外嘅天空,就好似絕望降臨一樣,籠罩住成個靜悶嘅世界。

喺黃昏完全落山之後,細佬嘅身體就喺被窩入面完全捲縮成蛋狀。雖然張被掩蓋住成個過程,但我已經腦補成類似退化咁。
原本我以為影片嘅重點已經結束,估唔到嘅係......
又多一個發現。
影片中,時間接近我嚟到Chloe屋企之前,有個不明人入咗屋,因為我聽到有開門聲。
之後,嗰個人更加入咗細佬間房東張西望,似乎搵緊啲咩......
係嗰個看更!話有人投訴滲水而上嚟嗰個保安!
「有發現?」泉叔聽到我小聲嘅驚呼。
我將影片暫停,停留喺嗰個保安嘅樣子身上:「呢個保安阿伯...嗰日上嚟嗰陣我見到佢,我已經奇怪點解佢可以開到門......」
「認住佢。」泉叔說。
我即刻拎手機影低佢個樣,然後影片都再無咩新發現。

泉叔一併拎埋Chloe全家嘅手機:「知唔知佢哋手機密碼?」
「唔知...」
泉叔又去到擺信嘅檯面上,檢查幾封信:「啲信拎埋走。」
「好。」
「重生會?」泉叔對其中一封信感到在意。
「咩嚟?」我湊近過去睇。
係一封,行文類似宗教設計嘅信件。
因為個機構嘅Logo有十字架,而且文中不少次提到類似「神」、「再生」、「救贖」、「潔淨」、「弟兄」之類嘅字眼。
「返到去再慢慢睇。」泉叔掃埋啲信件入袋中。

「呢家最緊要係搵到嗰個保安阿伯先,點解佢會開到門入嚟,同埋點解入細佬間房左望右望咁搵嘢......」
「仲有一件事好緊要。」泉叔沉下臉色,打開雪櫃。
「......」
「食早餐。出嚟咁耐,成幾粒鐘無食過嘢。」泉叔就地取材,拎Chloe屋企嘅食材去煮早餐。
真係俾佢嚇親,仲以為有啲咩緊要嘢。
趁呢個小空檔,我走入Chloe間房,靜靜咁坐喺張床到,感受佢曾經存在嘅氣息。
我順便拎出啱啱收集返嚟嘅嘢,慢慢咁睇。
「重生會......」以我所知,Chloe一家都係無神論者,點解佢會有宜啲信件寄嚟?
而且佢特別吸引我注意嘅原因,係因為佢Logo係一個蛋狀嘅橢圓形,而入面係個十字架。
信入面仲分別提到佢哋一家嘅名字,唔似係亂寄嘢俾人叫人信教嘅機構。

第二封值得注意嘅,就係醫院寄嚟嘅信件。
信入面提到,係外父嘅癌症診斷報告......
呢兩封信睇落各自獨立,但合埋一齊嚟睇,其實又好似內有牽連。
Chloe好耐以前都講過下,話要接阿爸去覆診,但無諗過佢爸爸係有癌症。
「食得喇!」泉叔喺廳到大喊。
泉叔煮嘅係腸仔蛋公仔麵,仲整埋我嗰份。
我一坐低,就將隻蛋夾落佢隻碗先開始食。
「啱啱拎咗啲信去睇,有冇咩發現咁。」泉叔問。
「嗰個叫「重生會」嘅機構,有種講唔出嘅詭異。」我說。
「點詭異法?」
「佢規定...唔係,佢用「提醒」嘅字眼,叫我女朋友一家每日要喺黃昏之前返到屋企,而且要將屋企大門嘅一條配匙俾佢哋管理。」
「咁似啲邪教。」泉叔笑一笑。
「係,同兔子人一丁點關係都無......」

「我就唔知,我冇興趣深究。」泉叔喺雪櫃拎枝啤酒:「我只係對獵兔子人,同救返變復活蛋嘅人有興趣,呢個係我天職。」
「天...職?」


正在加載第011章
文字
背景
默認
白色
米色
灰色
淺綠
綠色
深藍
黑色
共0章
  1. Loading...