「點啊？食唔落？食唔落咪飲啖酒。」泉叔將自己飲咗幾啖啤酒遞到我面前。
「我想搵返自己女朋友......」
「你係咪上到女朋友屋企之後，見唔到有人。」
「係...」
「係咪......」泉叔瞇起眼，認真咁問：「見到啲奇怪嘅「復活蛋」。」
「係......上面仲要畫住同我女朋友好似嘅樣......」
泉叔嘆咗聲：「可能太遲。」
「咩...咩太遲啊...！」我激動得際想企起身，一企就痛到仆街。
「冷靜啲，可能啫，只要佢仲未收集好啲復活蛋。」
「佢係指邊個！？嗰...嗰隻兔！！？」
一聽佢咁講，我已經臉如死灰，因為我最後一次見嗰隻兔人時，佢已經凝望緊碗上面嘅三隻復活蛋。
「呯呯！！」突然間，屋內震咗下，唔知邊到傳嚟某種敲打聲。
「你等我一陣。」泉叔起身，行去唔知邊到。
喺客廳，又望到泉叔掛住嘅相。
包括佢拎住枝獵槍嘅相、佢同老婆阿仔嘅全家福、佢同幾個兄弟一齊拎槍之類之類嘅相，睇唔出佢單身寡佬一個人住。
然後佢電視台檯頭又擺住好多比賽嘅獎，咩園藝獎、釣魚比賽冠軍，睇嚟係個全職生活人。
其實我有懷疑過，佢係捉後生仔返屋企嘅變態阿叔，但目前幾震撼嘅事都應該及唔上兔人鮮紅嘅雙眼。
「返嚟。」泉叔坐返喺張摺櫈到，問：「決定好未？」
「都係報警先......」我拎出手機。
佢一手撳低我部手機，唔耐煩咁講：「都話報警無用，佢哋最多列為失蹤人口案處理，真係會挖掘真相嘅人會有幾多？而且班警察到時仲會調查埋你、封鎖事發現場，到時一身蟻。」
「總之無論咩方法，我都決定咗要救返Chloe。」
「明白，咁即係你願意放棄宜家一切嘅生活。」
「......」
「因為喺過程中你一定會俾嗰隻「兔子人」盯上，如果到時佢眼睛變咗鮮紅色咁望實你，就代表你無論點都已經走唔到，除非解決成件事。」
「我...我已經...一早俾佢咁望住咗。」
泉叔聽完之後都愣咗幾秒：「咁睇嚟你，得返一個選擇。」
「......」
泉叔講完宜句之後就熄燈：「早啲休息。」
「望到又點...咩意思...」佢咁樣講一半唔講，反而令我更驚。
「講咗你會訓唔著。」
好不容易渡過咗一晚，琴晚嘅大雨已轉變成毛毛雨，天空就好似蓋上咗一層薄薄嘅霧氣，令人睇唔到平日嘅藍天。
我一拐一拐咁行出去，發現隻腳嘅繃帶包得專業咗，似乎係泉叔喺我訓著嗰陣幫我換一換。
「我整咗香草炒蛋，要唔要食啲。」泉叔劈頭第一句就問。
「琴晚...真係好似一場夢，我到宜家...仲以為自己發緊夢......」我無視佢檯面上嘅炒蛋，講出自己嘅感受：「一切都真實......」
「你即將面對嘅，係會啃食人類靈魂嘅生物。」泉叔淡淡地，道出一句。
「...」
「有冇用過槍？」
「無...」
「教你用一次，呢幾把都係改裝，加大咗焦耳嘅氣槍。」
如是者，我跟住泉叔出咗去鐵皮屋外面。