「咩嚟㗎？」阿妤特意往我收起地瓜的位置瞧著。
「冇嘢。」我側身把地瓜的樣子擋著。
「俾我睇吓啦……」阿妤按住我的腰，踮起雙腳。
「冇啊~」
「地瓜？」阿妤看著那地瓜，看得呆呆出神。
「係啊~鍾意食就食喇。」我把地瓜放到床上，讓她自取。
自己則側在一旁閉眼睡覺。
「……」咬嚼的聲音。
「好食咁多嘅……好甜喎。」阿妤搖一搖我手臂：「你去田到拎返嚟？」
我點頭，然後房間沉寂了一段時間。
「多謝哂。」她說。
「慢慢食。」
阿妤拉住我的手，把我身子翻過來，然後把地瓜那被她咬掉的缺口位置放到我嘴前迫我咬嚼。
「你都食啲啦。」阿妤按住我的頭，強逼我進食地瓜。
我無可奈何的咬了一口，喉嚨一瞬之間感受到地瓜那甘甜的滋味。
「超市買嘅點夠田拎番嚟嘅好食。」然後她把地瓜捏開一半，把另一半給我。
「地瓜乾杯！」她把自己手上握著的地瓜輕輕碰一碰我手上握著的地瓜，如同去酒樓大家說「飲杯」時的情況一樣。
她說完後，自己也忍不住笑。
笑著吃地瓜，阿妤大概是我見過所有吃地瓜的女生之中最美的一個。
「聽日係夏日祭典開幕日。」吃著地瓜，我無聊地說起。
「夏日祭典有咩做？」阿妤問。
「第一日得表演睇……第二日就家家戶戶都會擺哂檯喺街到食飯同買嘢……到時每家每戶都會將紅色紙燈籠掛係屋度……」
「喂，你兩個喺二樓做咩啊？」王大雞在樓下大喊。
阿妤跟我對望一眼，然後我向王大雞大喊，
「食嘢姐，喱家落嚟。」
「上面有乜食？」Eric大喊道。
我一口氣吞下地瓜，便跟阿妤走回去一樓。
「我買咗個中型煙花組合包！」阿雞拿出那組合包，在我面前炫耀。
「我有份㗎。」富貴妹一手搶去組合包，王大雞因為不夠她高而搶不回來。
「喂，還返俾我！」阿雞踮起腳也不夠她高。
「你夠高咪攞囉。」富貴妹單手舉高著那組合包。
「你唔好得吋進呎喎，你點講都好，都細我一歲㗎喎！」阿雞竟然學人說道理，他想笑掉大家的牙嗎？
「咩啊，大過我就要俾返你呀？你矮過我啊！短人！」富貴妹不甘示弱。
誰不知阿雞突然捉住富貴妹瘦弱的手臂，富貴妹瞪大雙眼推開阿雞，再摑他兩記耳光。
「你個死淫蟲……」
阿雞雖然兩頰通紅，但好像已經習慣了一樣，誇張的拿著組合包大搖大擺的走到戶外。
他拿起其中一枝「蛇型」的煙花，再點火。那捲「蛇型」煙花隨即像條蛇一樣捲著燃燒，發放出耀目的光芒。
我們都被那煙花的美麗吸引住……
「一齊玩啦。」王大雞把組合包拋到我手上，我取了最普通的直條煙花。
然後我們全部人圍在一起，同時間點火在煙花上。
「滋滋滋滋滋──」
正當我想找阿妤時，阿發卻已經佔據了她，跟她各自拿著煙花說些笑的樂的。我低頭看著自己手上那閃爍白色火光的直條煙花，有點不是味兒。
「喂。」王大雞走到我身旁。
「唔？」
「睇嚟你有心事。」阿雞做個趣怪的眼神。
「懶醒。」我用力抽打他後腦一下。
「嘩……」阿雞按住後腦，然後又狡猾地說：「我知你對遙嘉妤有意思嘅……」
「唔好再懶醒，我邊有可能鍾意佢……」我微笑。
「Good lucky啦，brother。」阿雞拍拍我肩膊，說：「如果可以欺騙一世嘅話，咁喱樣野就唔叫欺騙。」
到晚上睡覺時，我還一直在回想王大雞所說那一句……
若騙得一世的話，這不叫騙。
少見這個王大雞說這麼有哲學味道的說話。
翌日，我很早就走了去洗臉，在此期間廁所的門卻突然被人開啟。阿妤站在我面前，望住我的樣子有點發呆。
「咁早啊……」
「咳，早晨。」我說，然後把廁所讓給她。
在阿妤梳洗過後，她走到客廳的地上坐下。
「你好似有啲攰。」我說。
「喔……琴晚阿發同我傾計傾到好夜。」
「唔……」
我們兩坐在客廳的地板上，久久沒有話題。
「去唔去食嘢？」我問。
「好啊。」
我帶阿妤走到後門，然後騎上鄉村的單車：「坐上嚟。」
「坐單車？」
「唔會食咗你嘅~」
「喔，驚你炒咋。」阿妤坐上來後座，雙手抱住我的腰，把腳放在一旁。
「坐穩。」說罷，我踩踏到鄰近的士多。
可是我卻故意繞路，包括繞到那足球場外的長路。
「其實……你覺得阿發點？」踩到半路，我問。
「佢……幾謙虛……唔會好小器，份人幾nice。」她答。
「咁佢呢？佢有冇話覺得你點？」我反問。
「佢話我份人好開朗同外向……」
「對你評價幾好啊。」
「你都認為我性格係咁？」
這只是剛認識阿妤的人，對她認知的性格。
我搖頭。
「咁你認為我係點？」阿妤繼續問。
「你……私底下係一個唔多嘢講嘅女仔，唔鍾意同人透露心事。」
「最唔明白我嘅係你，最明白我嘅又係你。」阿妤笑得比苦瓜還要苦。
阿妤的身體，其實不錯的暖。
就像太陽般的溫暖，在我背後柔和的照著我。
踩到去士多後，我把車泊在一旁，然後跟阿妤點了一碗餐蛋公仔麵及兩件沙嗲牛治。
「你識唔識整啊？」我吃著沙嗲牛治問。
「第一次見喎……」阿妤拿著沙嗲牛治細看著：「可以試吓。」
「一陣我想行吓山。」阿妤遙看著遠處那座山。
「行嚟做咩？」
「行山要理由㗎咩？」
炎熱的太陽越來越猛烈，彷彿地上所有水跡都差不多被它蒸發一樣。
我跟阿妤吃過早餐後便一起往山上的路前進，在四周都可以看到每家每戶都開始掛起紅燈籠到屋前，而且舞獅等道具也散滿在山的入口旁，看來今晚會有場大型的開幕典禮。
阿妤一邊走一邊看著那些道具似乎很感興趣。
「點啊？想睇啊？」我逗笑地說。
「少少啦。」
「喱啲嘢通常得老一輩嘅人先會睇。」我點頭。
阿妤不屑的斜視著我：「點啊，即係話我老？」
「Who knows？」
「即係係啦！」她用力抽打我後腦一下。
「啊……痛啊。」我按住被她打的位置。
「你今晚會帶我嚟睇？」
「睇吓點。」雖然我可以直接答應，但循例要這樣說一下。
「你大澳原居民唔知第幾代嘅子孫嚟㗎喎，冇你帶路萬一我俾人捉咗咁點？」
「你咁好打~」小學都靠妳保護我。
「好打有個限度。」阿妤突然捏住我臉頰。
就這樣，我們一路上說著這些毫不關係，九唔搭八的事一直說一直行，不知不覺間走到山上最高的位置。
「呀──」阿妤走到山頂盡頭，對著整個大澳大喊一聲。
「喂……大佬，你唔熱㗎咩？」我在她身後問。
阿妤沒有理會我，再次對著無盡的前方大喊，就像要把所有積壓在心中不快的事都喊出來一樣。
「喂，一陣間曬到你啲皮膚傷哂啊。」我天生就總是這麼會擔心女生。
「咁關你乜事？」阿妤回眸一笑。
「咁……」好歹你也是個女神級數的女生，我不會想看著一件藝術品被白白摧毀。
「我話過啦，你嘅弱點係女仔。」阿妤嘴角微揚，但卻有苦澀的味道。
怎麼好像被她說中了一樣，難道又要擺出那一句「知我者，阿妤也」？
就在此時，蒸熱多時的天空終於下起大雨來……
「沙啦沙啦沙啦沙啦──」
雨水像黃豆大小般不斷滴下，天空的陰雲也掩蓋住整個太陽。
「咁鬼熱……一早估到會落雨。」我向阿妤拋一拋眼：「走啦。」
我們兩人雖然小心翼翼地下山，但始終因為泥地太過濕滑，害阿妤滑倒了一跤，還好我及時把她捉住。
「啊……」盡管把她捉住了，她的腳踝還是感到痛楚。
「喂……喂……喂，你點啊？」我先停下來，繼續扶著她。
「拗柴……」阿妤忍痛按住右腳，再望望天上的大雨：「你走先啦……我識自己返嚟。」
我看著阿妤坐在山中的泥地上，每動右腳一小下便會痛得雙眼也合上。
「……」阿妤咬著下唇，盡量讓痛楚減輕。
我再望向天上不知何時才下完的大雨，然後我選擇脫下自己一直紮著在腰間的一件輕薄外套披到阿妤頭上，再把阿妤整個人背起來。
「喂……你做咩呀？」阿妤有點嚇呆，一切也在短短數秒之內發生。
「抱穩。」我說，然後雙手從後托住她一雙腿，跑下山去。
「你掂唔掂架？」阿妤好像有點擔心我會把她摔倒。
我用最快的速度把阿妤送到下山，幸好平時在足球隊有練開平行訓練，而且每個雨天都會練球，因此濕滑的地面對我來說並不是什麼大問題。
最大問題是我能否一直保持體力把這個遙嘉妤背回到屋裡……
「唉，你放低我喺嗰度咪得囉。」阿妤反而有點不滿。
「點可能放低你一個喺度……」我盡量少說話，保持氣管暢順。
阿妤聽到後好像愣住一樣，之後只更抱緊著我一點，再沒有說話。
「你點啊？」阿妤拍拍我肩膊。
「啊──」我大喊一聲，同時間天上的烏雲也剛好散去。
我繼續向前奔跑盡管氣力已盡，雖然我看不到阿妤現在的表情，但感覺到她在笑吧。
一踏進屋子我先放阿妤到一樓主人房的床上，然後整個人坐了下來靠在床邊喘氣。
「唔該你。」阿妤說。
「一場兄……」說到這裡我驀然驚醒，沒再說下去。
沒氣說下去，沒勇氣說下去。
下雨聲充斥在整間屋頂，整間房子暗淡無光……我與阿妤再次陷入冷場。
「你休息下。」我離開房間，走回到二樓的房間休息。
我房間下面便是阿妤正在休息的房間，一板之隔的她到底在想什麼？想著想著，我自己也在不知不覺間睡去。
到我醒來的時候已經不知何時，只知道自己的頭有點暈，看來應該是背阿妤回來的時候淋雨發燒了……
「嗒嗒──」上樓梯的聲音。
上來的人是阿雞：「喂，你點啊，夜晚啦喎，嗰個乜嘢夏日祭典開始緊，出面好多人慶祝。」
我也聽得到出面街道熱鬧的聲音。
「我應該發燒……」我按住自己赤熱的額頭。
原本還想背住阿妤去看夏日祭典……
「阿雞，幫我叫阿發入嚟。」我說。
阿發進來後，一臉呆板地望住我。
「帶阿妤去睇夏日祭典。」我說。
阿發反應有點遲鈍：「吓，咁你呢？」
「我發燒。」我傻笑起來。
自己又不爭氣，又不想阿妤失望。
「背住佢，佢拗柴。」我提醒完他後便閉目入睡，想盡量讓時間過快一點。
「好。」阿發離開後，我才把眼睛睜開。
房間裡透著街外紅燈籠的暗淡紅光，令人更感意亂情迷、迷茫。
「如果係我呢，我就算發燒都會帶條女去睇啦。」阿雞雙手抱腰，靠住牆壁。
「你識條春咩……」我虛弱地說。
「我真係唔識啊，明知自己鍾意條女都不斷俾機會自己個兄弟……我真係冇咁蠢！理得你係我邊個，搶我條女同你死過！」阿雞說得滿腔熱血，現實又會否如此熱血？
「佢唔係我條女。」我重申。
「Brother。」阿雞走過來拍拍我肩膊，說：「愛唔會逃走，逃走嘅一直都係自己……你都活咗喺Ruby嘅陰影咁耐啦，唔通真係一世唔走出去咩？」
我握住拳頭，望向王大雞：「唔准講Ruby。」
好不容易，才放下了一點。
睡了一大覺的我，被後門的開門聲所擾。
正常王大雞、Eric和富貴妹應該吵吵鬧鬧地回來，阿發跟阿妤看的夏日祭典都應該沒那麼快完結……是誰回來了？
「嗒──嗒──」在樓梯上一跳一跳的聲音。
奇怪，會是誰？
然後那一跳一搭的腳步聲慢慢逼近，我的心便越來越寒……
到最後我的房門被打開了，站在我面前的人不是什麼怪物，而是因為「拗柴」而要單腳跳的阿妤。
在這暗淡無光，只有從窗外透射出來的淡紅光輝映照的房間裡，右腳已經紮住白色繃帶的阿妤站在門外凝視住我。
「咁……咁快睇完？」為打破沉默氣氛，我先開腔。
阿妤什麼也不答，坐到床邊按住我額頭感受著它的熱。
「阿發呢？」我繼續問
「佢話你發燒。」阿妤答。
「你咁快返？」
「你發燒。」阿妤望住我。
「我知。」
然後阿妤扶著牆邊一跳一跳的到一樓取了一條新的毛巾放在我額頭，房間裡的空氣彷彿代替了大家的聲音。
「你今朝睇落對夏日祭典好有興趣，點解仲要返嚟。」我苦笑。
「點可能放低你喺度？」阿妤抄我台詞。
我躺在床上跟坐在床邊的阿妤四目交接，彼此也沒有說話。
從我們小時候在幼稚園認識時，我們有想過，雙方都是屬於大家的嗎。
恐怕，是有一剎那想過吧。
一旦男女之間到達密友的那種關係，便很難把此轉化為愛情，可能是大家都會不習慣吧。
「喀──」前門開門的聲音。
突如其來的聲音把模糊、迷離、神魂的我弄醒回來。
「阿妤？我返嚟喇，我特登去咗市集買砵仔糕俾你同阿晞……阿晞佢訓醒未？」阿發在樓下大喊。
「喔……佢醒咗陣。」阿妤答。
阿妤一跳一跳的離開房間，回到一樓。
「喂喂喂……你小心點啊，你隻腳傷咗㗎。」阿發立即走到樓梯那裡扶她下去。
我望著天花板，然後望向窗戶外天空皎潔的月亮。然後，我不其然取出手機，打開「影片庫」其中一段影片……
影片中，一位少女對著手機說著：
「晨晞，有冇好掛住我呢？你係第幾次睇依條片啊？第一次、兩次、四次、十次？你都應該有老婆有仔女啦，可能你只係突然間感嘆世事，拎番條片出嚟睇，係咪估中咗呢。我都走咗好耐啦，仲有冇傷心啊？你唔好傷心添啊！打爆你啊！所以有冇學我咁享受喱個世界帶嚟嘅一切？有冇學我咁盡量陪覺得最愛自己嘅人？有冇學我咁好好學識珍惜每一分每一秒？冇嘅話你喱世人真係白活喇。從小呢，我爸爸就同我講，時間係一樣好奇妙嘅嘢，就算你用盡所有方法去改變，最後結局都係一樣，又或者只係受住不一樣嘅痛苦，但都係痛苦。
所以與期想改變時間一切，懷念過去，倒不如好好生活，從喱一秒鐘就可以珍惜，你話係咪？再見喇！Ruby嘅神奇魔法要消失喇！真係要消失喇！Ruby Close！。」
影片，去到這裡就結束。
無論一年前還是到現在，每一次都總會滲出心酸的感覺，酸得令人眼角莫名其妙地流出眼淚。
我關上手機、望著天邊的月亮，最後關上窗戶，於漆黑之中入睡。到了另一天，我們就捉了Eric到房間中，拷問他到底最近是不是在外面識到別的女生了。
「講！」王大雞拿著一條羽毛不斷呵癢著Eric的腳板、而我則負責捉住他雙臂，好讓他不會逃脫。
「啊哈哈哈哈哈哈！！！！！！！！唔好呀！！！！！」Eric被我們折磨得欲罷不能。
「你講出嚟，兄弟嘅，一定幫你。」阿發拍一拍Eric膊頭。
「講啦講啦！！！不過唔准同人講出去！！！！！」Eric邊笑邊叫道。
「講！」
「我喺網上面識咗一個女仔！！！！！」
「吓！？網戀！？」我們三人同時驚訝說道。
「我有諗過約佢㗎……不過……」Eric臉色突然沉下來：「不過……我根本就配唔起佢。」
「咩意思？」我追問下去。
「佢話自己係讀名校㗎，區內個一間迦密主恩中學，人又可愛，完全唔同我依啲呆呆鈍鈍嘅人一樣……總之，總之我哋就係兩個世界嘅人……」Eric頭一次說話會這麼認真。
「咁點解佢會肯同你傾計？」我問。
「唔知啊……可能佢真係好善良啦，佢真係一個好女仔。」
「咁佢叫咩名？」
「啊，我唔記得問佢咩名添！今晚問下！」Eric說。
「咁死得喇！」我們三個也被Eric激得倒了在地上：「連名都唔知學人溝女喎！」
你在玩我嗎Eric？
「小心俾人呃啊你。」阿發提醒Eric，始終很多網上騙案。
「雖然我呆呆鈍鈍，但係你哋都唔好真係當哂我係蠢㗎，我都識自己分析！」Eric反駁。
「好，當你同一個女仔出街，佢話對面個嗰女仔好靚，你會點答？」我問。
「我會答……睇下當時條女係唔係真係ok啦，假如真係幾靚嘅話，就認同佢。」
「第二條，女仔問你想唔想飲嘢，你會點答？」
「我會睇下當時自己口唔口渴囉。」
「死埋，你答錯哂。」我無奈搖頭：「愛情白痴。」
「咁正確答案應該係咩啊師父！？」王大雞單腳跪下問道。
「佢問你個女仔靚唔靚，係想你讚佢更靚，問你口唔口渴，係代表佢好口渴。」我說出答案。
「點解嘅？」阿發一臉茫然地問。
「點解嘅？！係囉！我都想知點解啊！！！就好似女人永遠唔會明咩叫越位咁，永遠，都唔明！！！有啲嘢只可以靠自己親身經歷去感受。」我說。
「吓……女人咁口不對心㗎咩！？阿晞，你教下我點可以追女仔！！！」Eric突然捉緊我手臂。
「哇哇哇……落晨晞，你直頭可以開間戀愛補習社，補習天王喎。」王大雞說。
「唔敢當，唔敢當。」我向王大雞敬拳。
「唔係咁講啊！有你依位情場名師教路，宅男都變美男啦！」王大雞繼續誇大。
「你做宅男博士囉，王大雞，你權威嚟嘅！臨床實驗做咗足足成十七年，有研究成果未呀？」我反問。
「我嘅初戀，只會留俾我嘅第一位。」王大雞不屑一笑的答道。
「阿晞。」阿發插口說道：「認真，其實你真係可以諗下搞個戀愛研討會，嚟幫我、阿雞仲有Eric一齊脫離苦海。」
「阿發……你唔係都陪佢哋癲啊……」我愣住。
「師父！」王大雞第一個跪下來：「我係你第一位徒弟呀！總之以後一談論到任何關於兩性嘅問題，我就會叫你做師父㗎喇！」
「師父！！」Eric見狀都即刻拜我為師。
「咳。」連阿發也單腳下跪了。
「喂……你哋繼續打飛機過日子啦，無啦啦做咩想溝女啫！？無益㗎，起番身起番身！」我逐個抽他們起身，但他們就是不願意。
「唔得！我中六喇，我知道自己條路應該點行！我要溝女呀，最後一年啦！！！！！！！」王大雞突然咆哮起來：「你知唔知冇咗女仔喺我哋中學生涯中出現，就好似人生嘅污點啊！！！！我唔想帶住遺憾過埋下半世呀！！！！！」
哇……王大雞把「毒撚」的終極怨念一次散發出來，看來我不能不就範。
「得！唔好嘈，直接約個時間，幫你哋三個幾乎未掂過女人嘅純潔大處男進行地獄式補課！」三個麻煩的傢伙，連追女生也不靠自己的話，怎在社會立足。
「一於就放完假，開學第一日！」王大雞說。
「記得每人封番一封大利是過我。」
「徒兒遵命！」